يا كلاش أقبل موسـم الصيـد ياكـلاش
أبشر بسعـدك والسفـر والمطاريـش
البـرد قـرب واللواهـيـب تنـحـاش
والوسم قد عرش على القـاع تعريـش
شوف الرياض الخاليه ينعـش انعـاش
ريضان خضرا ما توذت مـن الهيـش
ياكلاش حب البر فـي خاطـري نـاش
حب (ن) منقش فـي فـوادي تنقيـش
نيسان جاهـز بـه معاميـل وفـراش
يطربك لـي بـان الفجـر بالمغابيـش
لي روح بقفرن مـن الـرب معتـاش
نبتـه وزهـره والخزامـا مفـاريـش
عليه وبل السحـب شهريـن طشـاش
لين أرتـوت ذيـك الفيـاظ المعاطيـش
يازين فيه الخرب لـي كوبـر وهـاش
خربـن معـذب بالـدواره الدراويـش
ويا كلاش !! ياعوق الذي صابه أخراش
لا شاف قنيـص (ن) يفتـش تفتيـش
لي من عزم صاروخ وسط الفضا طاش
صاروخ عابر منطلق من عـلى فيـش
لو شافه انيوتن وعلمـه غـدا مـاش
همـش حسـاب الجاذبيـه تهمـيـش
عارض على شمس العصر كنه أفـلاش
محركاتـه غـاز ماهـي علـى ريـش
يا كلاش دونك فـدوه لعينـك الـلاش
الـجـو صـافـي للهدد والتطمـيـش
حده ورده مثل جمـس (ن) وحشـاش
اللي على حـد الحفـر شافـه الجيـش
بالكـاش حلـي للمعالـيـق نـهـاش
من يضربه دمه علـى نحـره أيطيـش
صخر طياره مثـل تصخيـر الوحـاش
يا عوق همـي والتعـب والتوشويـش
ظني ومدحي فيـك مـا قلتـه أبـلاش
يامن انشدو لي مالهـم بالخـلا ليـش
وياما ادفعوا لي فيك اهل الولـع كـاش
طنشتهـم مـن زود حبـك تطنـيـش
أبشـرك راعيـك لـه قلـب بشـاش
يغليك ولى حسـاب ياكـلاش ماميـش
ماهمني لـو عـذرب بقولـه الـواش
من دون شل الطيـر مانقـدر انعيـش
