[ع ــــذب الصفات]

أبعتذر وأنا أدري أنه ما يفيد الأعتــذار *** لكن لو أنك في مكاني كانك الحـين معــذور

متـردد أنطق كلمتينن في ضميري من نهار *** مخطي وسامحني عسى ذنبي من الصـد مغفـور

أخاف تتركني بلا ميعاد وأيامـــي قصـــار *** مدري غيابك عن زعل وألا غــلا وألا غـــرور

أنا أنكسـرت برغبتي والضوء لولا الأنكسار *** ما بان لك بين الزوايا المظلمة موجات نـور

يا سيـدي تشبه علامات الرخا والأزدهار *** من يوم عرفك ما خبرت الحظ يمشي في دبـور

الله ما أكبر عاطفة قلبك ولا سبع البحـار *** آسف أنا عندي خطأ في النحو لا سبع البحـور

ياأجمل صباحات الندى وأجمل خيار الأختيـار *** يا نعمةٍ يؤمن بها مؤمن ويجحدها كفــور

نهار وجهك ظلله ليلٍ على متن الوقــار *** حتى هوت من عيني الدنيا مماليـك وقصــور

وبقيت في عين الرجا دمعه وفرحه وانتظار *** وسكنت في وادي الظبى ياظبي لو ماأنت بعفور

أنا ما أحدك للقصـى يعني إذا صار القرار *** فرقا بكيت من الندم والظيق من بعض الأمـور

حرٍ حفظت من السماء ما تنزل الواطي حـرار *** ولا عليهم زود وافين المبادي والشبـور

هزيـمةٍ من عقبها ياتي ثلاثين انتصــار *** افضل ولانصرٍ بعده الحظ خايب ومحســور

تقدر تخليني بليا وصل من دون أعتـبار *** وأنا أقدر أبكي لين أعايد عبرةٍ تبري الصـدور

أبعتذر لك سالفتنا كل ابـوها بإختصـار *** أني أنا مخطـي ولا جا منك يالغالي قصـور


الشــاعر/علي بن حمري

 

 

 

 

 

 

 

 

توقيع : ع ــــذب الصفات

[flash=http://www.jr-7.net/up/uploads/files/jr-7-422220ada4.swf]WIDTH=500 HEIGHT=350[/flash]