تخالفت في داخلي بعض الاثار=واستلهم الشعر الحقيقي خيالي

وانتجت للعالم من حروفي اصدار=ولا نسيت ابث معنى مجالي

شاعر ولكن ما عليه اية غبار=شعره سكن داخل صدور الرجالي

واليوم دوا بالهواجيس واختار=فكره وثور من وراها جدالي

يا ملتقانا لا تبثون الاعذار=واقرو تعابير اللغه في مقالي

انا كشفت حروف والقاب وستار=واعلنت ما في خاطري باحتمالي

للصمت هيبه قبل لا يضرب انذار=وان دقت الاجراس ثار النزالي

شبكت في قلبي للافكار تيار=لما بغيته ثار صوبي وجالي

ما اخص شخص ولاني بهادم الدار=ولا بنيت بجال جرفٍ هيالي

انا تعليت المنابر والانبار=واشعلت حسي فوق روس الجبالي

لني سليل رجال شجعان واحرار=اشراف دايم يحتمون التوالي

اضرب على البيدا ثم اضرب على القار=واقطع معى القمرا شعوبٍ خوالي

واسرح معى مسراح بيحات الانوار=واقول لجزال القوافي تعالي

فياما حلا الدله معى بن وبهار=في عثعثٍ خالي بعيد المنالي

معى رجالٍ تحتمي الضيف والجار=يتواردون العز من كل جالي

ما بينهم خاين ولا فيه غدار=ما غير زمره من قروم العوالي

يطرب لخوتهم هل السيف والنار=لا ثور البارود قامت تلالي

هذا منا بالي ولا فيه معذار=عن لازم اهل الجود واهل المعالي

فكيت لحروف التعابير مضمار=واسرجت لابيات القوافي رحالي

حتى نسجت من المضامين مزمار=يطرب له اهل الغنج واهل الدلالي

انا موردها على كل الاخطار=ما تارد الا للقراح الزلالي

مضمونها يمشي على كل الاعمار=واحساسها يرضي كرام السبالي

حس المجامل يوم جا بين فجار=هل هو يراضي النفس والا يصالي

مديت بحروفي على كل الافكار=وابغى جواب يسد لازم سوالي

المصدر: الملتقى الجماهيري للشاعر محمد بن فطيس المري