[عزيز نفس]

ليلة فراقك .. ودمعك لمّا بعيونك بدا
من لمحته قبل أسافر.. ماهنا لي مرقدي

قلت لك :"أيام وارجع" ، والحكي ضايع سدى
لاْن - بالأيام هذي - حتى هالقلب يغدي!!

ياوطن روحي أمااانه كفكفي هذا الندى
واعذريني والله إن الوضع ماهو في يدي

كل شيّ ٍ ممكن إني أرفضه لجلك .. عدا
[شايبي] لامن زهمني قلت: "أبشر يابعدي"

انتي أكثر من عرفني ماهو من طبعي الردى
وآنا اعرْفك طووول عمرك ماتحبين الردي

رحت.. لا قلبي.. ولا فكري.. ولا بالي هدا
رحت.. وهمومي تجر أحزان درب ٍ سرمدي

المصيبه.. كثر ماني والسفر أكبر عدا
كثر ماربي كتب لي معه أجدّد موعدي!!!