السلام عليكم مساكم
صباحكم ورد يالغوالي
متواضعه عسى ان تعجبكم
اي والله ان حبه سطا بأوسط الجاش
ــــــــــــــ يجري معي بالجسم مجرا وريدي
ان غاب عني طاش وان رد لي طاش
ــــــــــــــ طيشة حزن والطيش الاخر سعيدي
يلعب بي الهاجوس مسرا ومغباش
ـــــــــــــــ لا راح هاجس جا بداله جديدي
غديت كني من محبته حشاش
ـــــــــــــ ما عاد ينفع فيه سجن الحديدي
يا رجل ياللي متعبش كثرة خطاش
ــــــــــــــ تصبري ما دام انا المستفيدي
جودي بمسراحش وجودي بمسراش
ـــــــــــــــــ انتي بسيرش والفكر بالقصيدي
منتي على خبري تشكين وش جاش
ــــــــــــــ ادري جعلتش رجل ساعي بريدي
لو كان من باب الرجاء بترجاش
ــــــــــــــ ماهو على شاني على شان سيدي
ودي اشوف اللي لمعلوقي انعاش
ــــــــــــــ بعده عذاب وشوفته يوم عيدي
وان كان ما شفته على ذالتعب ماش
ــــــــــــــ بدال ما تنقص همومي تزيدي
النوم ويش النوم غماض وارمااش
ــــــــــــــ بين الجفن والعين عود الجريدي
الله يا دنيا الغرابيل مقواااش
ــــــــــــــــــ لش بالشقاء عمر ٍ طويل ٍ مديدي
تعبت فالدنيا أمل في ملاقااش
ــــــــــــــــــــ اريد وانت تريد والله يريدي
الحب والحظ المعيثير والآآآش
ــــــــــــــ من جات في دنيااه ما يستفيدي
وسلامة الجميع
