مجنونة الحسن يرحم حال مجنونها
ما عاد باقي على طارف لسانه عتب
لو كان زعلان ما يرتاح من دونها
يزعل وإذا سولفت وياه .. طاح الحطب
جات تهادى مع القمرى على هونها
والغيم يمشي وراها ويتمايل طرب
تسحب خطاها مثل ما تسحب ردونها
كنها تبي تسرق عيون الاوادم غصب
خايف مقاريد خلق الله يحسدونها
لا مرت تشيل خطوتها غرور وشغب
البدر من لونها .. والشمس من لونها
ما بين (وجه اللوجين) وبين (جيد الذهب)
في شعرها في ملامحها وفي متونها
تلقى مزاجية الصمت .. وجنون الصخب
سلهامها فالحنايا يزرع طعونها
وعيونها في مسايير المنايا .. سبب
الله على جفونها لا رفت جفونها
تموّت الناس ما بين الهدب والهدب
ما ضيّع العالم إلاّ .. نظرة عيونها
مؤدبه .. بس نظرتها .. قليلة أدب ..!
