ياحبيبي ترى القلب بعدك سرح وانجرح جرح ما شفت مثله جريح
المحبه تجر المواليف جر الشجر وانت الأرواح جريتها
أنت سبة جروحي اللي جت ورهجت رجت العمر وأن جيت أباقوم أطيح
ساقني سم من طعم سمسم نسم وأنقسم نصف قلبي وناديتها
قلت ياناعس الطرف وش ذا الجفا ما صفا الجو حتى معك نستريح
قال من جرب الحب يلقى الشقا ما بقا غير رجلك وعنيتها
قلت من شافكم يا سمي البحر انتحر وارخص الروح علمٍ صحيح
صابرِ مثل صبر الجمل للحمل ليت الأقدام سارت وسريتها
قال ما كل من شافنا حافنا كافنا الشر لأفضحك وأطلع وأصيح
قلت من صاح مجنون تكفون تدرون ما كل خطوه تعديتها
قال يا مرحبا دق راس الجرس والحرس لا تسولف بعلمٍ فضيح
أحفظ الراس بالباس والناس لا تطّلع رحمةٍ فيك سويتها
قلت يا سيد البيض يا أبيض غضيض الحظيظ الذي عاشرك يا مليح
عشرتك تنشري بالذهب يا ذهب ذا وذا ذابت الكبد وأوذيتها
أثبتوني محباً بحبك بكا واشتكا تحسبك صرت كاسب مديح
ما دريت أن هذا البلا يا حلا حل حالٍ بحيلك تبليتها
الشاعر الكبير: خلف بن هذال العتيبي
