في سجن ظهران زرت اخوي ابن كدمه=وانـا وهـادي سعـود بحسبـة اخوانـي
جينـا زيـاره ومعنـا بالـرضـاع امــه=فـي قلبهـا شـوق مـدري هــم وحـزانـي
وساعة وقف قامت اتناديـه وتضمـه=من زود حب الضنا فـي قلبهـا الحانـي
ومـن زود شوقـه يـون وقــال يايـمـه=انـا عـلـى شوفـتـك بالحـيـل ولهـانـي
وقامت تنوح العجـوز وسلهمـت يمـه=ودموعـهـا كـنـهـا هـمــال ودانـــي
صاحت وناحت وزادت بالبكا همـه=ثـم قـال يـمـه كفـانـي هــم واحـزانـي
ثـم انكـسـر نـاضـره مــن هـمـه وغـمـه=بين الرجـاء ولأمـل واليـاس حيرانـي
ثم وقف رضا(ن)لها تواضـع وحشمـه=وقبل يديهـا ودمعـه فـوق الاوجانـي
ثـم التـفـت يمـهـا فــي خـاطـره كلـمـه=واقفا موادع وهـو مكسـور جنحانـي
ثــم كبـلـه حـارسـه بالقـيـد واختَـمـه=وامـه تنـادي بلهفـة شـوق واشجـانـي
ناحـت وونـت عليـه ونـادتـه بسـمـه=وقفا مـوادع وهـو راضـي وزعلانـي
وحملنـي امانـة(ن) تـبـرا بـهـا الـذمـه=قال انت ياخوي في ذمتك ورعانـي
ورحت اتفقـد عيالـه ثـم لقيـت امـه=والحـزن فـي صوتهـا المشحـوب ينبانـي
ثم صار لي موقف الا صارت مطمـه=مـن موقـف صـار واحزنـي وبكانـي
جونـي عيالـه وكـل(ن) مـن ملـى فمـه=يقـول بابـا سنـيـن طــوال ماجـانـي
وانا اشهد(ن) كـل حـي يحـن لـه دمـه=من بعد هذا حصل لـي موقـف ثانـي
جتنـي فـتـاة(ن) خطـاهـا تمـشـي بهـمـه=ثـم اعثـرت وانثنـت قـدام تنصـانـي
وعن راسها فرعـت ثـم طشـت اللثمـه=وتطـيـح وتـقـوم مضيـومـه وتنخـانـي
قلـت ابشـري والعسـر والله مـا همـه=الظاهـر ان القـدر للمـوت ودانــي
قالت ياعم اين ابوي اللي ولد عمـه=غرابـه ابـوي ابـن عمـه وهـو الجانـي
اشكي عليـك الزمـن ياعـم مـن ظلمـه=خالانـي اعـيـش فــي حـيـره وحرمـانـي
ياعـم تكـفـا تـلـف الشـمـل وتلـمـه=ابغـاك تفـزع وتنخـا قاصـي ودانــي
قلت الـردي جعلهـا تبكـي عليـه امـه=ونـتـي نخيـتـي وانــا بانـخـا كحيـلانـي
بانخـا ابـن فرثـان صقـر وكـره القـمـه=وانخـاه بسمـي وبـسـم شـيـوخ قحطـانـي
وادخل على ربنا اللي يكشف الغمه=وادخل على هادي ابن معيض لاهانـي
وانا دخيل الحضـن والبيـت والذمـه=وادخل على الحي واللي وسط الاكفاني
يامـارد(ن) للظوامـي صافـي(ن) جـمـه=واللي ورد له ما صـدر منـه ضميانـي
الحـكـم لله وحـكـمـك بـيــدك وسـمــه=لرضـاك مـا ننكـره لـو كـان ماكـانـي
والعاقـل اليـا بـلاه الله كـبـر حلـمـه=يـهـون الكـايـده يـاوجــه سنـحـانـي