الملتقى الجماهيري للشاعر محمد بن فطيس المري

فرحة يتيم لليلة العيد مانام

فرحت لـك .. وأنـا معاليقـي حطـام
والصدر .. مـن مـا فيـه بيّـح كنينـه*

فرحة يتيم ٍ .. ليلـة العيـد مـا نـام !
خـالاتـه , وخـوالـه .. مواعديـنـه*

مواعدينـه بشـت .. وشمـاغ بـسّـام
ويلّعبونـه .. فـي مـلاهـي المديـنـه*

مانـام .. واحـلامـه تـحّـراه قــدام
كنه يطـول أحلامـه ب( راحتينـه ) !*

صبحه تجّلا نـوره ب/ عيـد الاسـلام
وقبـل يـروح المسـجـد : ملّبسيـنـه*

جده مـا بيـن العيـن والجيـم والـلام
خلّـيـه يافـلانـه .. ولا تأخريـنـه !*
ت
راقبـه ب/ عيونهـا .. حـب وهـيـام
وعيونهـا .. ممّـا تكـنّـه / حزيـنـه*
"
يعرض لها الماضي مثل عرض الافلام "
ل.. ماضـي ابـوه وغـلاه وحنيـنـه*

يرجيه ل( سنين القسـا ) درع وحـزام
وجنـب ٍ علـى صكـات بقعـا يعينـه*

ابـو ثـلاث أعـوام .. والا 4 أعـوام
يغار منـه البـدر .. مـن كثـر زينـه*

صلّى وجاء وأمر الله اللي قضـى تـآم
ماهـوب داري عنـه .. زينـه وشينـه*

بشتـه عليـه .. مهنـدم ٍ خيـر هنـدام
واللـي ب/ عمـره .. كلهـم محترينـه*

يوم اطلعـوا للشـارع انقسمـوا أقسـام
وأهـم مـافـي القـصـه ؟ ملّعبيـنـه*

تداعـب رموشـه .. ذعاذيـع الانسـام
ويابردهـا .. يـوم آيبـسـت شفّتيـنـه*

وعلى تـراب الأرض بأصبعـه رسّـام
أمـا رسـم لـه طيـر .. والا سفينـه*

العيد طعمه كـان فـي الشـارع العّـام
ماهـوب عـن رغبـاتـه .. مقيديـنـه*

رجـع ولكـن فرحتـه ضايعـه ( دام :
كل ٍ مشـى ) وأخـذ ولـده ب/ يمينـه*

صاروا خواله في نظـر عينـه اصنـام
آحيـوا ب.. داخلـه الجـروح الدفينـه*

ولا عنده الا أمـه ونـاب القهـر سّـام
جاهـا يبـي منهـا اليـديـن الأميـنـه*

شعوره اللـي حـس بـه مثـل الإلهـام
وأول سؤال في بالـه : أبـوي وينـه ؟*

سؤال : لكـن كـان مثـل النبـا الهّـام
لازال باقـي فـي المسامـع .. رنينـه*

جته تعـدي , ماهـو تخّطـي بالاقـدام
وشالتـه بيديهـا .. وحـبّـت جبيـنـه*

أبوك : جاء البارح وقبـل الفجـر قـام
وشرى لـك ألعـاب , وهدايـا ً ثمينـه*

تراه حبّك وأنت غـارق فـي الاحـلام
وراح ل.. دوامه , والشغـل مرسلينـه*

لحظه .. وهو بيـن الحقايـق والأوهـام
والدمـع الازرق حايـر ف.. مقلتيـنـه*

يمّـه : تـرى مانمـت والعالـم نـيـام
ماجـاء .. ولا لمسـت يدينـي / يدينـه*

مدام رقمـه معـك مـن بيـن الارقـام
ب.. أكلمـه , يـوم إنـك تكلميـنـه !*

طاحت ما كن آلها من الصدمـه عظـام
ولاعـاد فيهـا صبـر .. ولا سكيـنـه*

قالـت بـدون شعـور وإدراك وإلمـام
أبـوك ! فـي تـراب القبـر دافنيـنـه*

العام مات .. ومـتّ مـن موتـه العـام
وكنـي بعـد مامـات عنـي سجيـنـه*

أبـوك جنـدي للوطـن ضـد الإجـرام
عـطـاك عـمـره دون داره وديـنـه*

تفجّـرت مـن تحـت رجلينـه ألـغـام
ولاعاد لـي بعـده حصـون ٍ حصينـه*

بكّت .. وطاح الدمـع مـن حـر الآلآم
وبكى وطاح الكـون مـن مـوق عينـه*

كـل ٍ عذلهـا .. بيـن عاتـب ولــوّام
تصّبـري .. خلـي ضلوعـك متيـنـه*

ماهو صحيح ان الضروره لهـا احكـام
اكبـر خطـاء يـوم إنــك تعلميـنـه*

بـكـره تنسّـيـه الليـالـي والايــام
هو فيـه أحـد ينسـى حـدا والدينـه ؟*

طير السعـد فـي عالمـه مابعـد حـام
والله يعـلـم وش تـخـبـي سنـيـنـه*

أنـا كـذا ! ساكـت وصابـر ومنضـام
لكـن كـان الفـرق بيـنـي وبيـنـه :*

الدمـع ل.. عيـون الأرامـل والايتـام
ودمـع الرجـل ذل وهـوان وغبينـه !*

** (منقوووووووووووووله)*