الملتقى الجماهيري للشاعر محمد بن فطيس المري - جمال الحمول بحزَّة الثقل والشيل

.
.

يطلع لك الطيب مثل طلعت سهيل
لا ضيّع الساري دروبٍ بغاهـــــــــــا

وطلعت سهيل تبشر الناس بالسيل
ويكفيك عن باقي النجوم بسماها

عليك في منصى الرجال الحلاحيل
اللي يحلون العقد من رشاهــــا

جمال الحمول بحزَّة الثقل والشيل
ولا كل من هام الثقيله قواها

في حزّة الشدّة تبين الرياجيل
لازمك يكشف طيبها من رداها

مثل الصباح إليا فهق مشلح الليل
والشمس زاحت ظلمته في سناها

عليك باللي يذلل الصعب تذليل
لا قال كلمه في فعوله حماها

إليا جاء اللزوم وشدو الحبل بالحيل
يحلها بالجاه وإلا شراهــــــــــــــــــا

هداج وان كان الزمن شح بالكيل
يمناه بالمدات جزلٍ عطاهــــــــا

لولا الفعول القول ما له محاصيل
ولا كل رجّال الطويله رقاهــــــــا
-
#شعر// #عبدالرحمن_حمدان_الصالحي

.