الملتقى الجماهيري للشاعر محمد بن فطيس المري - يا ناس راعي المحبة لا تعذلونه

يا ناس راعي المحبة لا تعذلونه
مهوب عن صاحبه داله ولا سالي

.

لو يسهر الليل كله لا تلومونه
الحب بلوى مانيب اول ولا تالي

.

لي صاحبٍ ما قطعت الياس من دونه
لو غاب عني خياله دوم يبرالي

.

الصاحب اللي سحر هاروت بعيونه
ودّي بشوفه ولكن ما تهيا لي

.

يا هيف الخصر عيني فيك مفتونه
والبعد يا صاحبي ما يرخص الغالي

.

الروح يا صاحبي بحماك مرهونه
عزي لحالي عقب فرقا هوى بالي

.

يا كود وصلك على مثلي ويا هونه
ان كان حالك طواها اللي طوى حالي

.

عن غيرك القلب غسلته بصابونه
والعين ما تلتفت في كل الازوال

.

ما يجرح القلب كود فراق مضنونه
ابطيت ما ارسلت لي يا زين مرسالي

.

أجر صوتٍ جميع الناس يوحونه
غديت مثل المصيح بالخلا الخالي

.

قصيدة للشاعر الكبير أحمد الناصر الشايع

.