اول شي اعذروني على الانقطآع
صادف شهر عبادة وانشغلنا وعسى الله مايشغلنا الا بطاعته

ثاني شي
احزني غيبة اخونا سعيد القحطاني
ولكن نتمنى رجعته اليوم قبل بكره

ثالث شي هاذي ابيات ارسلتها لواحد من الربع
كآن عنده منآسبه ولاقدرت احضر فأرسلت عليه هالابيات

سلام يامنصور والعلم ناصيك=يامحزمي وقت القسا ياعويني
حال القدر بيني وبينك وانا اخيك=والوقت ذا طبعه يزين ويشيني
العذر قدمته ولا فيه تشكيك=ولاهمني باللي جرا قبل حيني
عقلي براسي لو تزيد الشرابيك=وان ماخلصت مافرقتنا السنيني
اشفق على شوفك وذكرك وطاريك=ويرتاح بالي يوم اشوفك تجيني
ولمن ذكرت اللي حصل يا محاكيك=يهل دمعي بين حين(ن) وحيني
لجلك ببيع الخلق يالقرم واشريك=ولجلك جميع القاسيات بـ تليني
لكن عسى ربي يوفقك واخيك=يوفقه ربي بعد ياعويني

يامرحبا واهلين والله يحييك=في صدر واسع لك على كل حيني
وصلني المرسول والله يعافيك=ولافيه شكَه بين نفسك وبيني
عذرك سمين ولا على النفس تشكيك=وكل على ماقال عذره يبيني
مهما جرى ياخيك ماني مجافيك=يامحزمي وقت الزمان المشيني
لو تقصر الايدي ماتقصر اياديك=ويطرب لك المسحوب ولا الهجيني
كل القصيد يزين لاجبت طاريك=لانه من اسمك لازم انها تزيني
ولانك الامير وحشمة(ن) في معاليك=ومنصى الضعوف اليا غدا الوقت شيني
ان جيت وان ماجيت فـ الله يحييك=غلاك في صدري على كل حيني