الا ياقلب كم ليل(ن) سهرته=لكن ذا الليل من دون الليالي
خذاك الوقت ياحلم(ن) حلمته=من الخاطر وخلا القلب خالي
لو ادري بنتفارق ماعشقته=وعشت بدنيتي لاهي وسالي
لكن مكتوب ياقلبي وعشته=يقولون الصبر للهم جالي
صبرت وياكبر هم(ن) صبرته=كواني غير مارجع حلالي
احسبنه حلالي لين شفته=يوادعني يقول الهم والي
من اول بيت لآخر بيت قلته=ماغير الحزن من حبك صفالي
هذا هرجي من لساني سمعته=فلا تشره على قلبي وحالي
لو ان الموت بايدي ماذخرته=على نفسي مدام البعد فالي
بموت وقبري بقلبك حفرته=دخيل الله من هم(ن) جرالي
هذي حالي ليا مني ذكرته=يحير الدمع ثم يضيق بالي
وانا حبه مع دمعي حفضته=ودمعي في المحبه راس مالي
لكن دمعي على خدي نثرته=ولا ادري فالمحبه وش بقالي
سوا ذكراك ياليل سهرته=على فرقى وليف(ن) كان غالي