ياباب اشوفك يوم مريت مصكوك=خابرك عشر سنين مفتوح ياباب
ونصف العرب من طيب راعيك دلوك=وتلايموا في حوشك اصحاب واجناب
امشرع ٍ ماوقفوا بك وطقوك=ومنصور بالدله ولايوم قد غاب
لو دربهم من شرق لفوا ومروك=ولو دربهم من غرب ماعنك مجناب
والشارع مسكر بناس ٍ تنصوك=ربع وبني عم ومسايير واحباب
في مجلس ٍ فرشه من الناس مدهوك=الطيب عمدانه والافعال الاطناب
كل الشرايح جاتك اشيوخ وملوك=ومن زاد راعيّك على كل ماطاب
ابوخلف عون الخوي مخلي البوك=للحيل ذباح وٍ للعود حطاب
ينفع ولا يبغي من الخير مشروك=ينفع لوجه المعتلي رب الارباب
ماهي بنفعة كل مشروك مبروك=مزروعي ومن روس عطران الاشناب
ياباب عقب الزحمه اليوم متروك=امسكر وخالي ولا ليتك بشاب
شدوا هلك منك وراحوا وخلوك=وفرقاك ماهانت لكن هذي اسباب
شدوا بامر من يخلي بمده ابنوك=ويقطع لك ارقاب ٍ ويعتق له ارقاب
شدوا بامر شيخ ٍ فرج كل مضنوك=الشيخ ابو خالد به الضن ماخاب
من جاه من جور الزمن يبلع الشوك=عود على ربعه لهم درع وحجاب
آ مر على بيته وخلاه مدكوك=وبناه قصر وبدل الباب بابواب
ترفع له البيضا ع راس مكوك=ويصعد بها للجدي والعز هباب
عوض ضيوفك قصر مبني ومسبوك=ونصفه مجالس ماتسكر ببواب
في كل حزه للمسايير مفكوك=وصفر الدلال اتفوح والجمر شباب