******

ليلة البآرح وصبح اليوم كله=والحشى ملغوم وجروحي شظايا
الحزن رافق شعوري مثل ظله=والفرح قفى وأحاسيسي ضمايا
الغلآ كذاب ماله أي مِله=والزمن محشوم عن كذب البرايا
كنت أحسب الصمت يبري كل عله=أثر صمت الظلم ينهش بالخلآيا
ماجنيت من الثقة غير المذله=للخفوق اللي وهب صدقه عطايا
الغدر كشّر بناب وزاد غِله=ماكفاه اللي سلب قبلي ضحايا
إحتزم بالكذب لأنه صاحب ٍ له=وطوقوا قلبي بطعنات وسرايا
آآه من نزف الجروح المستّعله=أضعفت عزمي وسوت بي سوايا
مايفيد الدمع لو عيني تهله=ومايفيد البوح وحروفي سبايا
يابقايا الذات من هو خان خله؟!=من نحر بيديه نبضات الحنايا؟!
من شهر سيفه على قلبي وسله؟!=وأودع الشريان طعم ٍ للمنايا؟!
من كساني الهم ملبوس ٍ وحله؟!=من ثناني طوع وضلوعي عرايا؟!
فطنيني والخبر دقه وجله=لو ستره الوقت تظهره المرايا
جيت له بالقلب طاهر وإستحله=ويوم مكن به خذل طيب النوايا
كيف أداري الجرح وضلوعي تشله؟!=كيف أغض الطرف طيفه في الزوايا؟!
كيف أرد القلب يوم الشوق مله؟!=كيف أعيد الروح في باقي البقايا؟!
أعترف مات الأمل وأخلا محله=وإرتسم حزني على وجيه الصبايا
ياظلام الليل غط الكون كله=مابقى للعمر في ذاتي شرايا