سرا البارق اللي يشعف القلب في مسراه = سرا بعد ما وقع وصدر تعاميمه
تعدا مجر إسقام قبل الفجر و أمداه= و نوَخ على روس العوابر مجاهيمه
تخيلت ميقاعه و هاض الهجوس إِغنَاه=و قامت همومي تِبتِني كنها الغيمه
تَعبرت غير الحر يصعب عليه إبكاه=ولا له بيظهر خافي الصدر و يهيمه
تذكرت ذيك القاع والسيل في المنحاه=يشل الخزاما و النفل في مقاديمه
و تذكرت ربعي عزوتي طيبين الجاه=هل الحد من قدام تِرسَم مراسيمه
و تذكرت شعب" راعي الماشية يرعاه=و لا كل من يرعاه يرقى مراجيمه
وتذكرت زول" حالف" يا حمد ما أنساه=و لا صد دام الوجه يخفي تقاسيمه
عشير" حفظت اسمه وعايش على ذكراه=رغم جور وقتي محتفظ في معاليمه
أحبه وربي ميزه في جميع إِحلاه=ربى جوف قصر" ما تهاوت مراديمه
و أنا يا حمد قلبي كما الدلو بعد إرشاه=يتله هوا ديرة هل العز و الشيمه
أجامل زماني لين سمه علي عَداه=و قهواني الفنجال بِدَت معازيمه
حداني على الغربة ولا لي جهد ينهاه=كواني و ثبت في ظلوعي مياسيمه
يقول انه المكتوب لزم" على أقواه=و انا أقول خابر كل دقه بتعليمه
صبرت و رجيت اللي جميع البشر ترجَاه=هو الواحد اللي نلتزم في ملازيمه
عليه اتكالي عبد مؤمن بيوم إلقاه=هو الواحد اللي يبري القلب من ضيمه
و أنا يا حمد علمي شرحته لجل تقراه=و ردك علي مطلوب يا ذيب تقديمه
ما دامك رفيقي تعرف البيت من معناه=فلا بد من شور" يِبَيِن مراقيمه
تدانيت في الغربة و ذيبي يجر إعواه=و لِعبْ الحُكم و الصن تاليه تنعيمه
علوم الحياء جتني و قلبي تعبت أدراه=و مثلك ترى ما عاد يحتاج تلهيمه
خذ العلم وافي من بِدايته إلين أتلاه=وكيله معرب واثق" من تصاميمه

اصبحت والقلب الشقي فيه طعنات
ـــــــــــــــــــــ والعين طول الليل تذرف دموعي

تسمر معي نجمات وتغيب نجمات
ـــــــــــــــــــــ وأضحيت وانا مسندي راس كوعي

أقاوي العبرات بجهاد وسكات
ـــــــــــــــــــــ واموت واحيا ما دروا بي ربوعي

أكتم صواب ٍ عاش فالجوف ما مات
ـــــــــــــــــــــــــــ يخف يوم ويمتحني أسبوعي

أصامده حزات وأنهار حزات
ـــــــــــــــــــــــــ والحال مني في نزول وطلوعي

ما افادت العبره وكثر التنهات
ـــــــــــــــــــــــــــ يزيد مع كثر التنهات لوعي

جار الزمان وصابني منه وقفات
ــــــــــــــــــــــــ وانا من المقسوم ماني جزوعي

ابوح لو مابي من البوح ونات
ـــــــــــــــــــــــــــ ونات مظلوم ٍ صداها يروعي

تقطعت منها العروق الرويات
ـــــــــــــــــــــــــ وتحطمت منها صلايب ضلوعي

كني مريض ٍ علقوا فيه شاشات
ــــــــــــــــــــ وشافوا على الشاشات شي ٍ يروعي

سبة هنوف ٍ لا تنحت ولا جات
ـــــــــــــــــــــــ متعلق ٍ بين الرجاء والقطوعي

مثل العسيف اللي تعود التلفات
ـــــــــــــــــــــــــ لا جافل ٍ مني ولا هي بطوعي

أخطيت في هقوات واحسنت هقوات
ــــــــــــــــــــــ كله على شانه حسين الطبوعي

وارشف من دلال التفاكير جرعات
ـــــــــــــــــــــــــــ البن همي والتوجد قدوعي

وآخذ مع الهوجاس رحلة وسجات
ـــــــــــــــــــــ وتقطع علي الناس خط الرجوعي

يا من يبلغها جميل التحيات
ــــــــــــــــــــ واني لها يتبع ضماء القلب جوعي

قولوا لها تلحق من الحب ما فات
ــــــــــــــــــــ من قبل لا تطفى جميع الشموعي

الى متى وانا اذرف الدمع بسكات
ــــــــــــــــــــــــ ويتبع نهار السبت ليل الربوعي

تبغي تشوف أثبات فيه أكبر أثبات
ــــــــــــــــــــ خضعت وانا ما عرفت الخضوعي

وقبل آعرفها ما اعرف كيف عبرات
ــــــــــــــــــ واليوم لأدنى شي تسكب دموعي