جنون القلم

جنون القلم

.


يا قلم ما فاضت اشواقك ولا هاضت شجونك

خذ من أوراق القصيد الطارفه لا تحتريها

امتلا قلبك غرام وناحت الفرقا عيونك

واعذاب الصفحة البيضا إلى ما دجت فيها

سج رأسك مع صحاصيح الورق وازعج لحونك

خابرك ما تقصر الشرهات دون اللي تبيها

يا نحيل العود يا عزّي لحالك من شطونك

سيرتك في دفتر الأشعار ماني منتسيها

لك مواريدٍ ليا من جف صدرك ما تخونك

لا سريت تزخرف الأفكار يا عيني عليها

إن تخاوينا على بيض الورق كفي زبونك

ذيك نلقاها على الحروه والأخرى نقتفيها

عش على وجه الورق وافي ولون الصدق لونك

والسطور اللي توردك الملامه لا تجيها

روّض العاقل على حرفك وهو يقرأ جنونك

والمحابر وإن تلوّث حبرها لا تشتهيها

خل هقوات الصدور الممحلات تطيح دونك

شف عروس الشعر واكحل عينها وانقش يديها


.

الشاعر/ ضيدان المريخي

.....

المصدر: الملتقى الجماهيري للشاعر محمد بن فطيس المري