غربه بلا عنوان , محمد الدحيمي

غربه بلا عنوان , محمد الدحيمي

يعيـن الله يادنيـا تسـوق أيّامهـا الأحــزان يعين الله .. وانتي مثـل قفـل ٍ ضـاع مفتاحـه يعين الله ... وجروحي لها في كلّ وقـتٍ شـان كذوب اللي يقـول ان الزمـن بيـداوي جراحـه سقى الله يوم انا يمّه غريـر ٍ يزعـج الجيـران سقى الله يوم أنا طفـلٍ يصـج البيـت بصياحـه سقى الله يوم كان اقصى طموحي .. لعبة الدنـان نهاية يومي المغرب ... وأخاف الليل واشباحـه سقى الله يوم انا البس بشت ابوي وثوبه القيطان واقلد كلّ شيٍ فيه .. حكيـه .. جـدّه ..مزاحـه واشيل المسبحه مثله ليا هوجس وهـو سرحـان بيشعر ...واحسب ان اللي عطاه الشعر مسباحـه سقى الله بيتنـا ذاك البسيـط مشقـق الجـدران شجـاع ٍ يهـزم الغـدراء بقنديلـه ومصباحـه تكحّلنا القناعه .. لا طمع .. لا هم .. لاحرمـان وإذا جاء الليل تكفينا ثـلاث اخـوان ..طرّاحـه جميع الذكريات اللي غدت فـي قفـرة النسيـان يحاكي حلوهـا عبـره بمـوق العيـن سبّاحـه خذتني غربةٍ عنوانهـا ... غربـه بـلا عنـوان ابي عقب التعب راحه ... لقى فيني التعب راحـه رجعت اليوم مثل اللي رجع عقب القنص خسران غدا طيـره وجـاء يسحـب سلوقيـه وملواحـه قصيده مابَعَـد مـرّت ببـال مساعـد وضيـدان هواجيـس ابـدويٍ هايـم ٍ فـي عشـق فلاحـه وروح ٍ تايبـه كانـت تبـي لذنوبهـا غـفـران خطاي انّـي كتمـت اسرارهـا بعيـون بواحـه تقوليـن المطـر ماهـوب يمّـه دايـمٍ هـتـان اجل معذور قلبٍ فـي همومـه ضاعـت افراحـه انـا يمّـه غلطـت ولانـي اول واحـدٍ غلطـان ابونا آدم مـن الجنـه خـرج بأسبـاب تفاحـه خذلك الوقت فينـي .. ماخذلتـك ياأعـز إنسـان وش الدبره ؟ وحظي صار.. قفل ٍ ضاع مفتاحه !! مما راق لإحساسي ارجو ان يروق لكم

المصدر: الملتقى الجماهيري للشاعر محمد بن فطيس المري