الخبر جاني وسراني عن اهل الحلّه

الخبر جاني وسراني عن اهل الحلّه

الخبر جاني وسراني عن اهل الحلّه
ساقني سوق المطايا دون ماعرف ويني
حارت الخطوه ولا يوجد طريق ادلّه
ضاقت فجوج البسيطه والهوا مشقيني
نوب اقول اردع شفوفي واسلم من الزلّه
ونوب اقول اطلق عناني يمكن يقديني
والله انه ماحداني عن وليفي ذلّه
الظروف المعضله بين الوليف وبيني
لو ماخاف من المشاريه ومقامي والله
دون ماطرق بابها ما تنثني رجليني
بس تاقف ضدي سلوم العرب والمله
اتقيد في سلومي وافتخر في ديني
العذول يسل سيف التفرقه ويسلّه
والزمان يساعده يضرب على الجنبيني
اصبحت حالي سوات الدوله المحتلّه
كل مافيني شكى همّه على مافيني
التذكِر يعقد حبال الوصل ويحلّه
يسري المشفوح وقت ان البشر ممسيني
والهواوي ينجذب والمغريات اتلّه
تلّت حبال السواني بين حين وحيني
والقناعه تدفع الاحساس وتعللّه
والتمنّي يقتل احلامي قبل يحييني
لين تهت وضاعت احلامي وجهدي كلّه
واستفاض الدمع وارهى من محاجر عيني
فوح قلبي من فراقه مثل فوح الدلّه
سجّ عنها غافل يسولف مع الناسيني
الله يعين الخليل اللي مفارق خلّه
الليالي بين طيّات الشقى ترميني
لين صار الجسم ناحل والسوالف قلِّه
طالب اللي يشوفني لايقولِّي وش فيني
الطبيب اللي محدد لي علاج العلّه
راح والوصفه معه من غيره يداويني
شاعراً ماعاد باقي جنبه الا ظلّه
بس لامن شفت ظلي جنبي يكفيني
والله اني مارخي عزومي وانا عبدالله
قبل ماوصل مبتغايه واقهر معاديني

عبدالله بخيت السناني

المصدر: الملتقى الجماهيري للشاعر محمد بن فطيس المري