رشيديات ( شعـر )

رد: رشيديات ( شعـر )

الكل يبخص في الشدايد خراجه


الحر يزكي.. والدجاجه.. دجاجه
وماني على بعض المقاريد مجبور
.
الضرس قلعه لا تألم علاجه
لا صار ما ينفع معه طب دكتور !
.
وحكي القفى في الناس عيب وسماجه
واللي يتتبع عرض الأجواد مثبور
.
(نارد) قراح الماء .. ونترك هماجه
هذا لنا مبدأ.. ومنهج ..ودستور
.
واللي يطفي في الغداري إسراجه
لايحتري قمراء ..ولا يرجي النور !!
.
تراه يضيع صيدته في عجاجه
لا يسمع الناصح.. ولا يأخذ الشور
.
والكل يبخص في الشدايد خراجه
لا نشبت اللقمة من الغبن في الزور !
.
والحظ لابان الردى في حجاجه
أصبر مدام الصبر ياخوي مقدور
.
الله خلق كونٍ وسيعٍ.. فجاجه
والعبد لو يطرد وراء الرزق معذور
.
و(راع) الرفيق ولا تعكر مزاجه
خله سعيدٍ دايم الدوم مسرور
.
كسر الخواطر مثل كسر الزجاجه
نفس البشر دم.. وأحاسيس.. وشعور
.
واللي يتصدد مالكم فيه حاجه
يالله عسى إللي يدور الستر.. مستور
.
وحذرا تصير لبعض الألسن (علاجه)
بعض البشر يحلف.. ويشهد.. على الزور
.
والتمر يعرف طيبه من خماجه
ماجور ياللي تدهل الطيب ماجور
.
الواحد القهار راعه وناجه
الله يكافينا من الضيم والجور
.
يقوله إللي قاسي الوقت عاجه
صابر وهمه داخل الجوف مقبور !!

.
عبدالرحمن بن عبدالله المجلي

.

المصدر: الملتقى الجماهيري للشاعر محمد بن فطيس المري