تقـدم الدنيـا لنـا درس ٍ جـديـد بـكـل يــوم

تقـدم الدنيـا لنـا درس ٍ جـديـد بـكـل يــوم

تقـدم الدنيـا لنـا درس ٍ جـديـد بـكـل يــوم
والناس تسلم من غثـا الدنيـا بحفـظ دروسهـا !!
وعلى حسب حفـظ المواجيـب وتعاليـم السلـوم
نعـرف مقاسـات البشـر بالمرجلـه ونقوسـهـا
صيت الرجال الوافيّـه بأفعالهـا .. ولا ّ الرخـوم
ينبيـك عنهـا : قـل نفعتهـا وشـيـن نفوسـهـا
تطـرد ورى الدنيـا وتكشـخ بالمواتـر والهـدوم
مثل ( الحريم ) أغلـب دراهمهـا علـى ملبوسهـا
والإمعـه والشايـب الكـذّاب وضعيـف العـزوم
ناس ٍ مع العالـم بـلا هيبـه تدربـي روسهـا !!
والبخـل : خلاّنـه بهايـم !! لا تسـام ولا تسـوم
لا شفتهـا ترفـع يـدك حمـد وشكـر وتبوسهـا
على الصحن هم أول الجلاّس وآخـر مـن يقـوم
يعيّفـك حلـو الاكـل والشـرب طـول جلوسهـا
ماهيـب للـلازم سنـد ولا ذخـر عنـد اللـزوم
تمـوت ماسـرّك مهايطـهـا وكـثـر فلوسـهـا
وسوالف الخبلان .. رفعة ضغط وصداع وهمـوم
فـلاوة ٍ تخطّـف علـوم الـعـرب وتحوسـهـا
واجب عليك إليا حكت عن جملـة حكاهـا تشـوم
الهنـد مـا يـرأس حكومتهـا سـوى هندوسـهـا
وربـع المصالـح والمجامـل خـوة ٍ ماهيـب دوم
اقولهـا والتجربـه قـطـع وريــدي موسـهـا
وقت الرخا .. مثل الصقور اللي على المرقب تحوم
فيّ ٍ يـذّري ساقـك الرمضـا وحـر ّ شموسهـا
وإليا احتمت صكّات بقعا وامسـت علومـك علـوم
اتلـوّي خششهـا وتجحـد خـوّتـك وتدوسـهـا
من عقب ما انت الطيّب وقدرك معـزّز ومحشـوم
تصيـر اردى مـا خلـق ربـي ودم ضروسـهـا
أبعد عن الأشكال ذي .. بعد الثـرى عـن النجـوم
وش حاجتك في قرب رديـان العـرب ونجوسهـا
ماهوب عيب إليا عزموك تقول يالربع .. معـزوم !
العيـب : لارحـت لعزايمهـا وجيـت عروسهـا
وخلّـك فطيـن تعلّمـك دنيـاك درس بكـل يـوم
والرجل يسلم من غثـا الدنيـا بحفـظ دروسهـا !!

الشاعر /
محمد جارالله السهــلي .

المصدر: الملتقى الجماهيري للشاعر محمد بن فطيس المري

صح لسآنه محمد
مبدع . .


هداج شكراً عالنقل
الله يعطيك الصحه والعافيه يارب

قآسي يآزمن
اسعدني تواجدك الراااقي
كل الود والتقدير

صح لسان الشاعر السهلي ..
**
خيؤ هـداج تسلم على انتقائكـ الجميل
عسآك عالقوه ..
**
لكـ ودي |؛

اسعدني تواجدك في متصفحي
لاخلا ولاعدم

يعطيك العافيه

رووووعه

يعااافيك ربي تشرفت بمرورك الكريم
تحياتي لك