انا الضعيف

انا الضعيف

السلام عليكم ورحمة الله وبركاته

إليكم





ياغافر الزله وياخالق ملايكة العذاب
اجعل ملايكة العذاب تحول عني من سقر

ادعيك ياربي بكل آيه تضمنها الكتاب
في هول يوم القارعه تصرف عن الذنب النظر

وتعين عبدك يا إلهي في مشيبه والشباب
لولاك ما كان الجريح بلعنة جروحه صبر

زاد الفساد وقل خوف الخلق منك يامهاب
المعصيه بين الخلايق اصبحت سر وجهر

اعوذ بك عد المطر .. عد النجم .. عد التراب
اعوذ بك نارٍ حطبها ناس فجار وحجر

ما طهرتني كل قطره جات من وبل السحاب
لو هلّ فوقي وابل الزرقا وغسلني دهر

ارجوك طهرني بعفوك من دعى بك ما يخاب
وانت الذي كلماتك تغطي مدى وسع البحر

انا الضعيف اللي جرى خلف الخطايا والسراب
وانت القوي اللي تشوف النمله بجوف الغدر

وانا اللئيم اللي يعرفك بس ما بكى وتاب
وانت الكريم اللي تسوق الغيم وتهل المطر

فادعيك في وقتٍ غدت فيه النوايا كالغراب
فيه ادعى كمٍ نجس بأْنه البشير المنتظر

فيه الخبيث اللي فجر !! يدعونه بدمث الجناب
والملتزم ينقال له .. هذا مريض وبه ضرر

وقتٍ يخلي راس منهو في المهد بالهم شاب
فيه الكسوف بكل عام يمر يشكي للقمر

وين البصاير وين من جهز لآخرته زهاب ؟؟
وين الذي يغشى عليه ليا ذكر كلمة قبر ؟؟

الشايب اللي كان يبكي ليل خشيه للعقاب
اللي يبيع اللي عليه ليا قدم راعي فقر

اللي ليا منه نطق له كلمةٍ لازم تجاب
اللي يدسم شارب ضيوفه بذبحه والنحر

اصبح له الدرهم أعز من الجماله والثواب
ما عاد يفرق درهمه وده حلال او هو وزر

بدال ما هو يمسك اللحيه لتدبير الصعاب
اصبح يمسّك لحيته ناوي لفعلٍ به غدر

والشاب ّ ياللي قد ربى على الشهامه والصواب
اللي يطيع الوالدين ولا عصى والا نهر

اللي لجل ربعه جعل نفسه على ربعه حجاب
اللي يصون العرض يبغى وجه ربه والأجر

اصبح بلا غيره وفعله في هل الوقفات عاب
خلا المساجد واشترى من ذا المقاهي له مقر

لا هو ذكر همّ الفراق .. ولا ذكر همّ الحساب
همه فريقه لا يهزمه لا هلال ولا نصر

في الشارع .. تشوفه مقلم مخلبه مكسور ناب
والبيت .. تلقى له مخالب كنها مخلب نمر

في ذمته كمٍ مره يخلو بها من خلف باب
يدعيه شيطانه يسافر سوريا والا مصر

والبنت ياللي كان عفتها تهز أعلى الهضاب
اللي لها من والديها كل ماجوب وقدر

اللي عسلها بين خبز المدهن اتنحى وذاب
اللي تفوح دلالها مع نغمة طيور الفجر

انعدمت العفه بها ثم حرمت لبس الثياب
تلبس بلايز ضيقه يبدي بها نص الصدر

وأتبدلت بدل العباه اللي تحشمها بكاب
يرسم ملامح شكلها ويجسد اوصاف الخصر

نقابها .. كذاب من قال انها تلبس نقاب
تكشف مع العين الخدود اللي بها اللون الحمر

جديلها مكشوف لا شالٍ عليه ولا حجاب
وهدومها تنفح من انواع الروايح والعطر

هذا زمنا يحكي اللي صار فيه من اضطراب
واللي خفى ولا حكينا فيه كان ادهى وامر

ادعيك حسن المنقلب واخشى لسوء الانقلاب
وادعيك تدمح لي ذنوبٍ حلت ايام العمر

اللي يقدّر نعمتك واللي يخاف من العذاب
يبشر بما يرضي الضمير ليا سكن جوف القبر



وسلامتكم واعذرونا على القصور

المصدر: الملتقى الجماهيري للشاعر محمد بن فطيس المري