مسجدد وقبٌــــــــــــــــــــه

مسجدد وقبٌــــــــــــــــــــه

من ضمير الشاعر اللي كل طرقا تلتعبٌه=يا سلام الله على الحضار من قاصي وداني

والشعر تالي الزمن خلا من الهامي مسبٌه=بس انا من بين خلق الله ظاهر في زماني

كل دا بين النشاما لازم يلاقون طبٌه=والليالي تكشف اللي خبته عوج المحاني

يا هجوسي كل عرقٍ في طريق العز ذبٌه=وان بغيت العز كله فارتكز في كل شاني

دام ناصر من يجيبك شب نظم القاف شبٌه=لي تشعل للجمل نبراس في روس المباني

لا لفاك الزين شله وان لفاك الشين كبٌه=واحذر انك تحني الهامه على النذل الجباني

هب مثل الريح كل احساس ينتال المحبٌه=وامطر بوقعك على الاسماع من صلب المعاني

انتزع جزل الكلام وخذ من الموضوع لبٌه=واعلن اهاتك على العالم وقل ناصر بزاني

ايه انا اللي قمت اشيد للشعر مسجد وقبٌه=ثم تلوته زي ما يتلو المطوع للبياني

شي واضح في قلوب الناس بالعفه نصبٌه=وشي غامض لازم مفسر حديث وترجماني

ساسه الطاغي متين وماحد من الناس هبٌه=كنه طويق المسمى والذي جابه بناني

اختلاف الراي وارد والبحر مرسى وغبٌه=والدرر في قاعته وين الذي يهوى السماني

والطريق المستوي لا جا على عرضه مطبٌه=ما تاثر فالطريق اللي عليه السيل ساني

كل شاعر ينتهض ويبين في حزة منبٌه=بس ما حد في مغيبي يقدر يغطي مكاني

ناصر اللي ما عبد فالكون غير الله ربٌه=ما تهيب من فلان ولا وضع قيمة فلاني

عارفٍ قدره ونفسه للعلا تمشي مكبٌه=رايته بيضا ونبراسه سطع فالفرقداني

بس في تالي الزمن شعري وضع مني مسبٌه=والله الباقي وغير الله في ذا الكون فاني

المصدر: الملتقى الجماهيري للشاعر محمد بن فطيس المري