لك رب ما يخذلك لو يخذلونك!

لك رب ما يخذلك لو يخذلونك!

ما راح من عمر التعـب مـا يكفّيـك ؟
ما هزتك طيحـة هقاويـك .. دونـك؟
.
.
... يا "باعث" قبـور الحـزن فـي محانيـك
لو مـا رجعـت لْدفنهـا .. يدفنونـك
.
.
هذا الحزن لـو مانتهـى بـك بينهيـك
خاوى تفاصيلك .. وعـوّد بدونـك !
.
.
شف شيبك اللي من همومك عثى فيـك
وكيف التجاعيد عْبثت فـي جفونـك !
.
.
جسمك تهـاوى مـن عنـاك وتعنّيـك
ونبـرات صوتـك غالبتهـا شجونـك
.
.
لأْنك تنفسـت الشقـا فـي مساريـك
شف كيف صدرك مختنق من طعونـك!
.
.
بعت المنـام لعيـن مـن نـام ناسيـك
حتى غـدى ليـل السهـارى زبونـك
.
.
لا تنتظـر مـن خانـك إنـه يواسيـك
لـو هـو يحبـك مـا تجـرأ يخونـك !
.
.
قلبـك تعلّـق فـي مخاليـق تشقـيـك
ونسيت حب الخالق اللـي يصونـك !
.
.
الناس في عونـك ، إذا الحـظ يعطيـك
وان شح حظـك؟ قالـوا: الله بعونـك!
.
.
ارقى عـن أسبـاب الزعـل لا تخليـك
عبد لهمومـك كـل مـا يزعلونـك !
.
.
دنياك حلوه .. لـو تلفّـت حواليـك؟
تلقـى مـن ا بعـاد البشـر ينصفونـك
.
.
لو شفتها بعين الرضـا هـي تراضيـك
ولو بالكدر ؟ مـا خالفتـك ا بظنونـك!
.
.
افرد جناحيـن الفـرح فـوق ماضيـك
حلّق عن الذكـرى ومـن يجرحونـك
.
.
غيّر مـن الواقـع إذا كـان عاصيـك
جدد من الأحلام .. مـارس جنونـك!
.
.
ازرع فيافي الصـدر بأخضـر طواريـك
الكون كله ساعـة ا رضـاك .. كونـك
.
.
الليل تسهـر مـع نجومـه .. تناجيـك
وتبـادر ا طيـور الصبـاح ا بلحـونـك
.
.
بـث الجمـال ا بكـل رسـم ا لمعانيـك
خلّ الطبيعـه تاخـذ احسـاس لونـك
.
.
خذ من خطاك اللي يصحـح خطاويـك
لاتشيـل مـا لا تستطيعـه متـونـك
.
.
وان ضقت.. أو ضاق الزمن؟ ارفع ايديك
لك رب ما يخذْلـك .......... لـو يخذلونـك

المصدر: الملتقى الجماهيري للشاعر محمد بن فطيس المري