الملتقى الجماهيري للشاعر محمد بن فطيس المري - عرض مشاركة واحدة

#1 08-17-2017, 04:14 AM

نصيحة ذيب #شعر

.
.

الذيب ما يمشي إلا معه ذيب
وان كان يمشي دون ربعه خطيّه

والطيب هو طبع الرجال المذاريب
اللي محبتهم من الله قويّه

والمرجله للشهم راع المواجيب
اللي الى أقفت عنك ، نفسه ضحيّه

ترى كثير الخير عالِ المراتيب
عطيّته يا زينها من عطيّه

وإلا الكريم إياك ، يومن له تعيب
قدِّر كريم الطبع نفسه غنيّه

راع البخل شكاك خلّوه في ريب
إن كان يبغى العز يرخي ايديّه

المبتلى بدنياه كلّه عذاريب
ينهان بين الناس مثل المطيّه

ترى اللسان احصان بين النواجيب
إن صنته زانك ، وان تخونه جنيّه

خل عنك ما قالوه أهل النواصيب
واللي يهين الناس يبلى بليّه

والوعد لا تخلف ولو فيه تأنيب
ترى الوفا بالوعد أجمل هديّه

الدَّيْن ابعد عنه كلّه مخاليب
وان ما تسد الدين صارت قضيّه

تظلم بك الدنيا ، ويا سرع ما تشيب
كم واحدن بالدَّين ضيّع خويّه

البندق العوجا لا بد وتصيب
لا تستهين بطلقته مثل حيّه

الحظ يوم يصيب وياكثر ما يخيب
وخير المزن إن جاء معاها إبرديّه

الشمس تطلع بأول الصبح وتغيب
ودنياك إن طابت تراها نديّه

خل التفاؤل دوم ورشّ التراحيب
الجود من يمناك ويسرىً خفيّه

واطلب من الرحمن وبين المحاريب
وكثّر دعاك الصبح وعقب اعشويّه

وإنص الأقارب والأهل والصواحيب
واحرص عليهم لا تضيع الهويّه

الأم مثل العين وفوق الحواجيب
إرفعها فوق الراس قَدْر وأبِيّه

وابوك قل له سمْ لا تقول ما نيب
هو اللي امربّيك واحذر عصيّه

وزوجتك هي شمسك بين السراديب
هي نصفك الثاني وحُبَّهْ وصيّه

واخوك عَطْه القدر رِفْعه وترحيب
تلقاه عند الضيق يفداك ديّه

واختك الى شافتك مابك عذاريب
تمدحك بين الخلق وكل البريّه

وابنك على طرياك عند المناصيب
يقوم لك تقدير ويضرب تحيّه

وبنتك تشوفك فخر كل المعازيب
تفداك في نفسه وكل الرعيّه

صاحب عزيز النفس وقرّبه تقريب
ترى الدّني موْسوم بفعل الرديّه

اوصيك بالقرآن وفعل المواجيب
لا مت تلقى القبر ضيٍّ وفيّه

يا واترن بالليل ربك لك مجيب
وعسى مع المختار نحشر سويه

ترى الحياة ادروس وعبره وتهذيب
احرص على الخيرات قبل المنيّه

يا راكبين الخيل ما شفتوا الذيب
ترى عيون الذيب ميّه بميّه

خلّوه على ممشاه وشدّ المقاضيب
وان إرتخى ما شد ، شدّه شويّه

-

#شعر/ د. سالم محمد المالك

.
.
المصدر: الملتقى الجماهيري للشاعر محمد بن فطيس المري