بعد مالله على مثلك هداني=بأعدك يامحمد من خواني
واطوع لك حروفي في القصيده=وافصل لك على قدك معاني
ولاني جاعلٍ راسي براسك=لأني لو نطحتك بآتعاني
انا املك كف ابو ليلى وعنتر=ولي تفكير عقل الاصفهاني
اصيغ الذم لكنّه بحكمه=وافل المدح لعيون الغواني
من عيون الشعر بانحت كلامي=مدام الله ربي قد عطاني
سكنّي في منام الليل جني=وسلمني حصان وصولجاني
ليا منه دعى للشعر داعي=لقيتوني معدني في مكاني
لقب شاعر بني هاشم خذيته=من الركن العراقي لليماني
انا الشاعر وغيري نص شاعر=وانا عشري حشى ترجع ثماني
وانا لا جيت اعد اية قصيده=يشيّب راس منهو قد قراني
قريت معلقات الشعر لكن=تهون بحظرة السبع المثاني
مثل ماني حضرت وقلت قولي=بطل مفعول قولك يافلاني
يابن عمي ترى ماهي غنيمه=اذا حنا غنمنا بس ضاني
نبى نغنم لك الله صافناتٍ=تسر اللي سكن خلف المحاني
ابى شاعر له العذرى تكحل=ليا منه تعنّى ثم لقاني
مابى شاعر يهج الزين منه=قصيده مايوثقها الضماني
يابن عمي قبل تبحر علينا=فشف لك بحر من حوله مواني
انا قدرت طيشك يامراهق=ولاني معتبر طيشك لفاني
(فإنا لو قسونا في شجاعٍ=تحَوّلَ من قوافينا جباني)