عوده لتنسيق هذى القااف الرائع الذي دار بين كل من الشاعر عبد الله السفياني والشاعر قاصد كريم ,,
كانت البدايه وهي خير بدايه عند الشاعر عبدالله السفيااني ,,
قايلا ً ,,
هـلا يامرحبـا والقلـب لاسالـي ولاطربـان=ولكن لجـل عينـن تكـرم الدولـة واهاليهـا
رضينا مانقول إلا اللذي يرضيك يارحمان=إله الكون يعلم حاضر الهجـره وماضيهـا
فرد الشاعر قاصد بهذى الرد الجميل ,,
عوافي وانت وافي والمحبه تجبر الانسان=ولكن سرها عل وعسى تطرب بتاليها
رضيت بما رضيت بطاعة المولى عظيم الشان=عساك تيمم الوجهه وتسريها ونسريها
عبدالله ,,
على هذا بذلنا كل ما نملك من الوجـدان=رسائـل راقيـة مضموننـا يصحابنـا فيهـا
انا مدرك واقول السيل ما يأتي بلا هتان=ولكن رحمة الخلاق كـل النـاس ترجيهـا
قاصد ,,
صحيح اللي تقول وكلمةِ يرجح بها الميزان=يشذ من القواعد شي عنها مايباريها
فلا تامن سحاب الصيف سيله ياخذ العربان=ومن له عادةِ يابن العرب ماهو مخليها
عبدالله السفياني ,,
على رسلك تذكر قبل وقت وسالف الازمـان=وهذا الوقـت فـي نعمـة كبيـرة عائشـن فيهـا
ومن لم يدرك الخطوة ولا يبني على سيسان=يــروح سالـفـة للـنـاس والـعـربـان تـرويـهـا
قاصد كريم ,,
يوقفني كلامك وقفة اللي فارق الاوطان=يراجع ذكريات ايامه الحلوه ويبكيها
عسى ماخلاف والمكتوب يظهرلي من العنوان=اشر سلعة خليل الاحمدي قدام لاشريها
عبدالله السفياني ,,
يشوق المغترب من ما فقد من صحةالابدان=عيونه ما تذوق النوم والاوجـاع تعميهـا
تبحر فالرسالة وافهم المكتوب ياخو افـلان=بعدها عامل التجار واعرف كيف تقضيهـا
قاصد كريم ,,
الا منا رمينا اهدافنا مانخطي النيشان=وغيري يخطي الشاره ولو زانت مراميها
اذا سلمت تجارتكم وقايدها ابو سفيان=قليل اللي سلم من معركة بدر وضواحيها
عبدالله السفياني ,,
تبورد وارم مذرع قبل لا ترما من الميدان=وتمسي مثل سلعة عند بايعها وشاريهـا
جميع الناس شافت كل ما قلته بلا برهان=علامك ماتؤكـد هقوتـك حتـى تعديهـا
قاصد كريم ,,
وغيره ويش عندك وانت في الملعب وفوق حصان=نمشيها لجل عبدالعزيز اللي يراعيها
يقولوا عنك عبدالله رجل فاهم وسيع بطان=عساها ماتخيب الهقوه اللي فيك هاقيها
السفياني ,,
ثمار إقطاف هرج الشاعر اللي يحبك القيفان=يسج الفكر بالمضمون والعربـان يوفيهـا
تلوح ابروق وعيونك تشوف النار والدخان=تقهقر ناس واجد والموالـي فـي نواديهـا
قاصد ,,
ترى الله يمهل الطاغي الين يهدم الاركان=بعدها يخمد الفتنة ويهلك راس راعيها
يصيح المستغيث اليوم مايلقى معاه اعوان=له الله والنعم بالله عسى النصر بتواليها
السفيااني ,,
ترى التاريخ ما يضلم ومهما صار مهما كان=يسجل ما مضى تبقى حقيقه عنـد قاريهـا
علومك مثل لوحة بينة فيها ثـلاث الـوان=وتلفت كل من شاف الرسوم اللي مسويهـا
قاصد ,,
عليها ساهرن مانام ليله جعله الطوفان=شرك بارزاق خلق الله شماليها وغربيها
لكن ياعودنا المذخور روح امرح ترى الشيبان=يعادون السهر بالليل لو هو مايعاديها
وفي البدايه والنهايه تمنيت ان هذى القاف الجميل ماينتهي لكن بيض الله وجيهكم ولاهنتم وصح الله السنتكم وقلووبكم وان شاء الله نتابع لكم طاروق ثاني .
