ياللي عليك الحشا والروح ملهوفه=يَـتَّـمت قلبي وصار الحزن ميراثه
كثرت رجاويه فيك وقلّت حسوفه=منكوب ماتنقذه حملات الاغاثه
ماينقذه غير وصلك يابعد شوفه=تنعش عروق بذكرى الوصل نفّاثه
مواصلك ينعشه ويلبي شفوفه=ومفارقك يخلفه ويغير احداثه
يميزه من يشيل السيف بكفوفه=والهندي اللى على فجله وكراثه
ليتك ترفّق على المحزون وتروفه=وتجابره في عزاه وترفع انكاثه
ماله جدى الا يصوغ القاف وحروفه=يطري له اللي مضى ويجدد ابحاثه
لاشك يصبر لو ان ايديه مكتوفه=ماينحني للمصاعب طبع ووراثه
الله يعينه على همّ برى جوفه=يَـتَّـمت قلبه وصار الحزن ميراثه