هزاع المهلكي
مرحبا بالشاعر اللي لايكل ولايملي =عد همال الخيال وعد ذعذاع النسيمي
انت لك مده تمشى فالحفر مدري حولّي= وجابك الله في يديه يابو نواف التميمي
بونواف التميمي
ارحب ارحب يالمطيري والمهلي ما يولي=البطا سبة دوامي يالكريم ابن الكريمي
الحفر وايا حولي كلها اديار خلي=مير شف لك يالمطيري وجهتن يم القصيمي
هزاع المهلكي
البقى يابو حجاجن للنشاما مسفهلي = كان من سبة دوامك قول والله العضيمي
قيسوا وش عرضكم بالصانتي ولا بملي = وانت رجالن تعرف العلم ماظني غشيمي
بونواف التميمي
انت رجال تصوم وتفهم العلم وتصلي=صادق في كل كلمه قلتها لك يالزعيمي
وش بلا عقلك تفطّر يالمطيري واضمحلي=هرجتك احذر تقطك يالمطيري في الجحيمي
هزاع المهلكي
ودي اسطي فيك يالشاعر لكن خايف تذلي = واحمد الله واشكره علمي يوقع فالصميمي
انت يبغالك 300سنه تاصل محلي = بعدها يمكن تسير امع الصراط المستقيمي
بونواف التميمي
راحتك خذها تراني ما امل وما اكلّي=خابرن بندقك عوجا للهدف ماتستديمي
آصلك في كل حزه مير خلك مستظلي=والله اني كنت احسبك مثل صياف السحيمي
هزاع المهلكي
لاتحداني بمنقارك هذا ياطير ياللي = ماني بذابحك وانته شاعرن توك عليمي
لاتمد يدينك العوجا لك الله ثم تشلي = ثم يقولون التميمي صايرن شكله عديمي
بونواف التميمي
والله اني فالمواجه ما اعدك فزعتلي=خابرن شلفاك ترقل مثل رقل المستضيمي
احمد الله واثق الخطوه ولاني مستعلي=اركد اركد خل رجلك تنفعك عند المقيمي
هزاع المهلكي
آه الا ياوجد حالي جعل منته صاحبن لي = دامك انته والخريشه فالمواقف سيم سيمي
لاتغرك هقوتك مادام لك قلب متدلي = راحت علومك لك الله بين سين وبين جيمي
بونواف التميمي
ابك انا لا شفت زولك صابني شيٍ يغلّي=واحمد الله يوم اشوفك مبعدن منتا نديمي
المره وش جاك منها يالمطيري تكفى قلي=وان بغيت الصدق فرّق بالفطيمي والبريمي
صح لسانك يالذيب
