هانت حياتي وهان الدمع من عقبه=اللي منحني الحنان وحب خفاقه
اليا دعيته يلبي وأهتني بقربه=والقلب يفرح وشمسه تعلن إشراقه
بدل رحيله حياتي وأجدب التربه=والعين عقبه غزتها دموع حراقه
حر ٍ تعلا الفضاء قائد على سربه=شامخ ونادر وعملة عز براقه
يابوي عقبك شكيت المُر والغربه=وهموم بقعا علي فِتْحَتْ لها طاقه
الجوف ينزف بسيف الضيم والحربه=واليآس مجرم وفيني ثبت وِثَاقِه
مرحوم يامن سعى بِمْوَادَعَهْ ربه=خذاه مني ملاك الموت وإستاقه
غير القدر ماقدر شخص يتلاعب به=لأنه الشجاع الذي ماقد حدٍ فاقه
ياليت عيني تشوفه وأنعم بحبه=وأرجع لماضي حياتي حيل مشتاقه