لعيونكم من جديدي
مع السلامه روح ماعاد لي فيك
ماعاد ابي قربك ولا عاد اباكا
خلاص يكفي ذكرياتك وماضيك
باعيش باقي العمر وانسا هواكا
اتعبتني واحرجتني وش تواليك
وهزيت عرش الحب بين الشراكا
حطمت قلب" طول عمره يناجيك
خمسة عشر عام ادور رضاكا
في داخلي تحيا وتهمس معانيك
وأشوف وجهك كل ساعه واراكا
وانا معك مابين واقع وتشكيك
أحس بك وآقول ماني معاكا
اغيب عنك اسنين وارجع والاقيك
يحدني هم السنين ال قاكا
كل عام تتجدد وتكثر بلاويك
متمركز " في ذا وهاذا وذاكا
اشعلت نار الحرب واحرقت خافيك
وسببت ضجه للبشر وارتباكا
فتحت بيبان التعاسه باياديك
ياما نهوني هيك عنك وهاكا
أشغلتني عن واقعي دون تحريك
تلعب بفكري دون تبدي حراكا
حسبي على اللي بارخص اللبس كاسيك
وحسبي على سود الليالي معاكا
اسمع خلاص اليوم بابعد واجافيك
ماعاد ابي قربك ولا عاد اباكا
