السلام عليكم ورحمة الله وبركاتهـ
قصيدة بقلم الشاعر فارس خليل
فرقاك ..
فرقاك ليه عقب الجرح جرحين=والمشكله قربك جهنم من الخلد
ماعاد قلبي يحتمل صد غالين=اهواك مهما يحدني دونك البعد
للعشق لذه في قلوب الملايين=بس البلا لا صار حب معه صد
مثلي عناه الجرح طعن السكاكين=وشلون منك جاتني شحة المد
من طيبتي باسم الوفا قلت اهلين=كنت أتمنى بيننا الوصل يمتد
لكن حسافة لوعة الشوق تخمين=فيه الجفا عاده واجازيه بالود
كنت احسب إن الحب جنة محبين=واثريه بيت من زواياه ينهد
مثل الاسير اللي تغرب من اسنين=عند الامل تلقاه.. والباب منسد
واليوم في سود الليالي مقفين=حظي ردي عكس الهنا دايم احصد
مدري غلط سلمتك القلب والعين=والا قدر فيه التصابير لابد
قفيت رغم الطرف تحت النياشين=والدمع مثل السيل باين على الخد
ماعاد لي في الشوق منصب وتعيين=دنيا وفيها الطيب نادر ما ينعد
اصبحت مثل الحرف بين الدواويين=كني على وضح النقا قوس يرتد
حتى الهنا والانس صاروا موليين=ضاع التعب من وين يا ريحة الورد
وامسيت في فرقا المواليف مسكين=هايم عليه الموت يرخي ويشتد
جفت عيون الري بين البساتين=ليت المفارق بدل المر بالشهد
ياهاجسي لا تخلط الزين بالشين=بعض الخواطر دار مبني على وجد
ان لم نكن وسط المحبه محاميين=وش عازة العين تبكي ولا تلد
كلي شغف مشتاق يكفي تغاضيين=وجدي عليك ملامس الخد واليد
هذا الوفا لو قالوا الناس وافيين=محدن على جمر الغضى يفضح السد
أتمنى ان تحوز على رضاكم
تحياتي
