السلام عليكم ورحمة الله وبركاتة
صبحكم الله بالخير والرضا والعافيه
قبل يمكن شهرين طلعت رقم جديد ولا احد يعرفه من الربع
وفيه واحد من الجماعه من اهل الكويت
ودايم وانا اقوله تعال للرياض
والرجال يتعذر بالضروف والدوام
وتجيني علومه انه يزرق لوادي العجمان او الشرقيه ويرجع
فارسلت له ابيات من الرقم الجديد
اقول فيها
صبحك ربي بالرضا والمسرّه
ياصاحبي نافل عسى الله يجازيك
وياشين طبعك صاحبك ماتمرّه
وانته تدوج بين هاذي وهاذيك
واشوف لك في بعض الاحيان جرّه
وتقرب حراوينا ولاهوب يمديك
ماهوب قصدي يالسنافي تشّره
لا والله الا شوق مانيب مخفيك
فـرد علي ويقول
يامرحبا باللي لفى دون جرّه
ياصاحب(ن) مابانت ألنا مواريك
تقصد وتبدع قاف وتشيل جرّه
وتسير في دربك وتحسب خطاويك
اللي نعزه لازم أنا نمرّه
لو كان يمشي في طوارف ذواريك
ياصاحب(ن) مدري بخيره وشرّه
اليا زعلت ابشر بمنهو يراضيك
وسلامتكم
