يامرحبا ياللي يسب بخوّيه = يامرحبا ياعارفين المواجيب
سبيتني من دون ذنب وخطيّه = وظلمت حظك ليه يامنبع الطيب
جيتك مناصح جيتك بحسن نيّه = ماكنت احسّب للملعن محاسيب
الشك مايدخل نفوسٍ غنيّه = وش علومكم يامدورين العذاريب
راع الرداء شرواك مافيه زيّه = اليا شربت اشرب حظيظ المشاريب
مبروك ياللي محتذي لك حذيّه = حذيتك ماهي تودي ولا تجيب
هجومك الليّن مايثر عليه = والصقر ماينصاد بين العياسيب
كوع على زندك براس الحنيّه = مانته محقق في قصيدك مطاليب
سويت نفسك شاعر العالميّه = وجيت اتبلاني فبعض الاساليب
انصحك ياراع العلوم الرديّه = تحتاج لك بالشعر سجّه وتدريب
بيتك ملخبط يازبون الشريّه = وشعرك قسم بالله بين العرب عيب
خل الشعر لاهل البيوت الذريّه = مانته بجايب زود لو تمتلي شيب
الحظ والمقسوم قربك ليّه = وجتك السهوم اللي تحش العراقيب
تبغى تضحي مير رحت الضحيه = وهاللحين مالك عن سهومي مجانيب
الشعر يفتح لك جروحٍ دميّه = وانته على جرحك فتحت الدواليب
قال المثل ماباخر الطيب كيّه = وهذي هي الكيّه ولابد ماتطيب
سبيت ساسك يوم سبيت فيّه = والصبغه السوداء طلع وسطها شيب
لاخير في رجلٍ بليا حميّه = من سب ساسه تدخله شكّه وريب
راسك لو تهزه هبوب اجنبيّه = ذريت راسك من هبوب الاجانيب
لو جيتني شرهه وحق وقضيّه = اعطيتك المطلوب بين الاشانيب
الشعر عندي والحروف ابجديّه = والذيب دايم تعجبة خوة الذيب
من دون حلقي واقفاتٍ يديّه = والصقر ماتحميه غير المخاليب

المصدر: الملتقى الجماهيري للشاعر محمد بن فطيس المري