يقول مـن عـدا علـى راس .. عالـي رجـم طويـل يدهلـه كـل قرنـاس
في راس مرجـوم عسيـر المنالـي .. تلعب به الارياح مـع كـل نسنـاس
في مهمه قفـر منـى النـاس خالـي .. يشتاق له من حس بالقلـب هوجـاس
قعـدت فـي راسـه وحيـد لحالـي .. براس الطويل ملابقـه تقـل حـراس
متذكـر فـي مرقبـي وش غـدالـي .. وصفقت بالكفيـن يـاس علـى يـاس
أخذتـ اعـد ايـامـهـا واللـيـالـي .. دنيا تقلـب مـا عرفنـا لهـا قيـاس
كم فرقت مـا بيـن غالـي وغالـي .. لو شفت منها ربح ترجـع للافـلاس
يامـا هفابـه مـن رجـال مـدالـي .. ما كنهم ركبوا علـى قـب الافـراس
ولا قلطوهـن للكمـيـن المـوالـي .. ولا صار فوق ظهورهن قطف الانفاس
ولا رددوا صـم الرمـك للتـوالـي .. كل يبي مـن زايـد الفعـل نومـاس
مـن بينهـم سمـر القنـا والسلالـي .. مثل البـروق برايـح ليلـه ادمـاس
يقطعـك دنيـا مـا لهـا اول وتالـي .. لو اضحكت للغبن تقـرع بالاجـراس
المستريح اللـي مـن العقـل خالـي .. ما هو بلجـات الهواجيـس غطـاس
ما هـوب مثلـي مشكلاتـه جلالـي .. أزريت اسجلهـن بحبـر وقرطـاس
حملـي ثقيـل وشايلـه باحتمـالـي .. واصبر على مر الليالـي والاتعـاس
وارسي كما ترسي رواسي الجبالـي .. ولا يشتكي ضلـع عليـه القـدم داس