مَشّيت قلبي في عجايب صفاتك=يا اللي عشانك عين خلك شقيّه
أسرتني وأعلنت قوّة ثباتك=يا قوّ قلبك بسّ هوّن عليّه
من رقّة الكلمة تعاني شفاتك=وتروح لي وتجيبني لِك ضِحيّه
من نظرتك أسّست فيني غلاتك = ومن بسمتك كل المشاعر نديّه
أنت أمنياتي يا منى الروح جاتك=أروح أنا فدوة بها البندريّه
من جا سألني قلت : يا شيخ فاتك=وأقعد أهذري والمعاني خفيّه
محدٍ درى وأخاف تظهر حلاتك=لعيون غيري والعواذل أذيّه
وان قلت لك بآموت تطري وفاتك=وإنّك تموت اليوم وايدك بيديّه
ما ابديت حبي لجل تقفي خطاتك=ابديت حبّي لأن عينك جريّه
ومن جمال الحب رمية عباتك=على عيوني وانبرت كل كيّه
لكن وصالك صار أبخل سماتك=صرت أحترق لك وأحتري منك كل جيّه
هذي علومي يا حياتي و جاتك=وقّع حضورك صار حُبّك قضيّه

المصدر: الملتقى الجماهيري للشاعر محمد بن فطيس المري