لا ينشغل بالك من الدنيا و اخذ منها العبر
ــــــــــــــــــــــــ ما نقدر نغير قواعدها ولا موالها



وش فيك تصفق بالكفوف وبالخدود وبالصدر
ــــــــــــــــــــــــ اطلق حجاجك وانسف بغترتك فوق عقالها



عطني يدك لا يابعد دنياي و آمرني امر
ــــــــــــــــــــــــ وان قدّر الله شلت عنك من الهموم ثقالها



قم واجلب الرسلان و أركدها على جمر السمر
ــــــــــــــــــــــــ واذا استوت بقنادها درّج علي فنجالها



واذا اعتدل كيفي عطيتك من تجاريب العمر
ــــــــــــــــــــــــــ درس ٍ درسته من قسى الدنيا وبعض احوالها



الأوله ما يذبح عزوم الرجال الا الفقر
ــــــــــــــــــــــــــ ولا يرفع اشباه الرجال الا كثير اموالها



المال خلا الببغا توكر مواكير الصقر
ـــــــــــــــــــــــــــ لكن لا جات اللوازم ما تشوف افعالها



والثاتيه اصبر على ماجاك لو طال الصبر
ـــــــــــــــــــــــــــــ وارضى بمقسوم ٍ حصل والمقبلات بفالها



والثالثه تكفى تراه اكبر خطا وادهى و امر
ــــــــــــــــــــــــــــ ركز معي و أنس الامور الباقيه واشغالها



لا تجرح اللي لك بقلبه حب واخلاص وقدر
ـــــــــــــــــــــــــــ ومن زود حبك صد عن كل العرب واقوالها



يمد لك كاس الهنا وتحط في كفه جمر
ــــــــــــــــــــــــــ اشوا لك انك تموت قبل المعرفه واشوا لها



والغايب اللي غاب دامه لا رجع معه العذر
ـــــــــــــــــــــــــــ فأرض التسامح والسموحه كلنا نسعا لها



والصدق واجب واحترام الغير في هرج ونظر
ــــــــــــــــــــــــــــ احسب مخارج كلمتك قبل تحسب مدخالها



وتشكي المحبه والجفى ... الحمد لله والشكر
ـــــــــــــــــــــــــــ هو به حد ٍ ما مس كبده طعنة ٍ بخلالها



اما حزن والا قهر والا وجع والا سهر
ــــــــــــــــــــــــــ اصبر ما دامك جيت سكتها وشفت اهوالها



ترا المحبه حاجتين اما بحر والا نهر
ــــــــــــــــــــــــــ وانت ونصيبك بين حر شموسها وظلالها



بس النهايه مالنا من واقع الدنيا مفر
ــــــــــــــــــــــــــــ فتره بسيطه وان تمادينا نعيش اطلالها

اعطي عِبر وانا بحاجة من يلقنّي عِبر
ــــــــــــــــــــــــــــ و اعززك وانا عيوني ما وقف همالها