قال الذي زين المعاني قطفها // أمثال مبداهن عن الشك مفرود
أمثال عنهن قاصر العرف يفها // من حيث درب العرف طلعات وصعود
لو كل من قال المثايل عسفها // ما صار نقص بالمعاني ولا زود
والبندق العوجا تجنب هدفها // الى صار منظرها عن القطر مصدود
وغاية جميع الخلق محد عرفها // رضا جميع الخلق ما هو بموجود
لا شك تدي كل نفس نصفها // ترى كلام العدل يظهر له شهود
من رابع العاقل لنفسه صرفها // عن تيهة يشقى بها ما بها فود
اسمح عن الليل تيهته ما عرفها // يمكن يرد اليالقى الدرب مسدود
لومي على اللي تيهته قبل شفها // ومن العيا كنه عن الرشد مطرود
نفسه على شين المماشي حذفها // اصبح ذميم لوه من نسل محمود
لا يفتخر بافعال ناس وصفها // لها الفخر كانه وقف ماقف العود
ما كل اجاويد تبعها خلفها // لا بد ما يخلف حمد سيرة حمود
كم واحد يمت جدوده نسفها // على الشمال ورد مع دربه ورود
ضرب دروب ما نشد عن كلفها // وكدر سماه وصار بالجهل مزيود
نفسه خطا غيره لعب في شرفها // اصبح بخيت لابس ثوب مقرود
كم واحد ربعه يعدل عجفها // من نشوته صاروا مشاكيل وفهود
عنهم مهمات الافاعي كتفها // ماحد يجيهم بطش والحق مريود
لومي على راع مماش حرفها // عن درب ابوه ودرب جده هل الجود
اقول له دنيا بلا مدح عفها // ترى تلاي الجسم للقاع والدود
انتم بثر ناس تقدم سلفها // مرحانها تسفي خلايا من الرود
هذي مبانيها وهذي غرفها // بقى العمار وباني القصر مفقود
وغيره بيوت للفداوى رففها // مثل الجبال السمر وألوانها سود
محلي حلاها عقب سيرة صلفها // في خايع نبته لها ارقاب عاصود
كم فيضة زين المباني كنفها // بيوتها للخيل عن مرتع الذود
قب مطاليب المقفي نحفها // ياما نضح منها العرق نضحة الجود
لا من كساب الزعيمة خطفها // صاح الصياح وجاوبه حس بارود
كل ركبها ما نشد عن كلفها // جنك على الداعي مع الحزم جلعود
كم ابلج عنه الجبانة كشفها // خلي بجيش القوم حاوي ومردود
وكم ابلج نفسه حياها قصفها // اصبح فؤاد امه من الحزن ملهود
هذي سلوم اللي تقافت صففها // يوم الهوا عدل لركابها القود
واليوم ترحم حالها من ضعفها // ما كنهم شيفوا بمرباع وعدود
مضما البكار اللي تنفض شعفها // لو تاصله عينت به ربق وهنود
قلي علام الوقت هذا صدفها // واقول لكل هذا اخر الوقت مشهود
محد تصاريف الزمان اكتشفها // تغيرت سلم على الخلق مقدود
دنياك بالقفلات يضرب صلفها // لمحة بصر ما له سنا برق ورعود
غدارة لو اضحكتك بطرفها // تراك عقب الضحك ببكاك ما عود
ان اقبلت قامت تمشط زلفها // هنوف عرس طيبها المسك والعود
وان ادبرت شفت الكدر من حرفها //تمسي تسيد وتصبح الصبح مسيود

المصدر: الملتقى الجماهيري للشاعر محمد بن فطيس المري