الملتقى الجماهيري للشاعر محمد بن فطيس المري - بيني وبينك...لاتشب الحرأآآيق

يالله ياخالق جميع الخلايق

ياخالق(ن) تعلم بحال الخليقــــــة

يافارج الضيقات عن كل ضايــق
تفرج لقلب(ن) فيه ضيـقه وضيـقه

منها جــروح الـحـب عـمـق العمايـق
أثـر الـهـوى تبطي جـروحـه عـمـيـقـه

ياللي ورى الباب المطرّف توايق
لك ويقة" فاقت على كل ويقــــــــه

كنّك على ما وسط قلبي تهايــق
مدري عرفت السر ولاّ تهيقــه

سلام تسليم (ن) سليم" ورايـــــــق
تسليمة" من سمعها لان ريقـــــــــه

قرّب شوي شوي وأخذ الحقايـــق
هات الحقيقة وأنت هاك الحقيقة

حقايق(ن) نكتب عليها وثايــق
آخذ وثيقة وأنت تآخذ وثيقـــــــه

(( هـذي بـدايـة حـبّـنـا أول دقايـــق
أكيد كـل اليوم كنّه دقيقــــــــــــه ))

القلب فايق ليه ماهوب فايــق
والقلب تـر ما كلّ شي" يفيقــــــه

خيّرت قلبي في جميع الطرايــق
وإختار ماله غير حـبـك طريقـــــه

بعض العرب مع بعضهم علايـــــق
ومالي ومالك بالعلايق عليقــــة

وراعـي الـهـوى تسرق عيونه سرايق
ياللي سرقت القلب رد السّريقة

إن كان طال الصبر مانيب طايـق
أخاف مـرّ الصبر ما عاد أطيقــــــه

بيــني وبيـــنك .. لا تـشـبّ الحرايــــــق ..
وغـــيري وغــــيرك جـعـلـهـم فـي حـريـقـة

هـذا خــبــر والناس عشق وعشايــق
الله يعطي كل عاشق عشيقــــه

هرج العـرب غيرك يجيب الـشّـقـايـق
ولاّ أنت هـرجك هو علاج الـشّـقـيـقــه

أهديت لك بيت(ن) من الشعر لايق
ياللي تليق الشعر ياللي تليقـــه

وفتحت قلبي لك قصور وحدايــق
في كل قطرة دم قصر وحديقـــة

الله يلمّ الشّمل لمّ الحلايـــــــــق
حليقة مصبوبة في حليقـــــــــــــــــة