الملتقى الجماهيري للشاعر محمد بن فطيس المري - @ لا تظلم الوقت خل ّ الوقت في حاله @

السلام عليكم ورحمة الله وبركاته أخوتي وأخواتي في الله

مشاركتي لهذا الصباح هي عبارة عن قصيدة قرأتها وأعجبتني

بفحواها الحكيم والرائع الذي تجلا وسما بين خبايا كل شطر من

شطورها وهي من كلمات أخي في الله الشاعر ( زائر المساء )

بإحدى الصروح التي أشارك بها واستأذنته بنشرها وجزاه ربي كل

خير لم يمانع ووافق على نشرها وكلي امل ان تروق لكم مثلما راقت

لي وتكون بالفعل قصيدة ترتقي لذائقتكم الشعرية .. اللهم آآآمين

والآن أترككم لقرائتها يقول أخي الشاعر ( زائر المساء )

الحكمة .. مطلب وقليل من يؤتيه الله تلك النعمة .

ولكن من أرادها فعليه أن يتتبع خطى من آتاه الله شيئاً منها

ويحرص على ما يسدونه إليه من نصائح

لي جدّ بلغ من العمر ما يقرب من المئة عام أطال الله في عمره

وأعماركم على الطاعة وأحرص دائماً على أن أتجاذب أطراف الحديث

معه ومع كبار السن عموماً لقناعتي بأن مخزونهم وتجاربهم كنز

لابد أن ننهل من فيضه

هذه قصيدة متواضعة كانت نتاجا لحوار صار مؤخرا مع جدّي أبقاه الله

أرجوا أن تروق لكم

مريت جـــدّي لقيته جالس لحاله

بأيديه دلّه بزاكي الهيــــل دللّها

جلست عنده وأنا صبيت فنجالـــه

حبيت راسه وقلت أرجـــوك حللّها

يا جدّ عندي هموم (ن) تفرش الصاله

هذي مسائـــل أبي تعريف مجملها

يا جدّ وقتي ذبحني من ردا حالـــه

ما عاد فينـــي أَزمّ حمول وأحملها

الناس تجحد كريـــم وتنكر أفضاله

حتى صديقي تردّى مــــع رذايلها

يا جدّ تكفـــــى ترا مليت هالحاله

عطني نصيحه وأنا أوعـدك ما أهملها

عَــــدَّل جلوسه وقام ونكّس عقاله

قال اسمع الشــــور منّي لا تطوّلها

أعرفك شاعر ذهيـــن وتعرف القاله

مير اكتب القاف واعرف كيـف تجزلها

لا تظلم الوقـــت خل الوقت في حاله

وش دخّل الوقت يبلش مع خبايلهـــا

كم واحـــد(ن) جا بفكره يركض لحاله

وإلى توهّق .. يقول : الوقــت عاملها

يا باغي الطيـــب طبّ وشوف منزاله

أقرا حروفي ودقـــق في دلايلهــا

الرَجْـــل وقفه .. وطيبه طيب أخواله

والنفس شينه تطيــــب بطيب شايلها

احـــــذر ترافق دنيّ النفس وأشكاله

النفس تصبح قرينــــــه في مثايلها

خـــــل التعالي وقَول الزور وأفعاله

وأكسب جميلــه وكثّـــر من جمايلها

أبذل سخـاك وتبــدّى زبنك بفالــــه

وقدّم لضيفك وليمــــــه ما تخيّلهـا

ولا تســــــرج الخيل إلا وأنت خيّاله

ولا تجلب الدّون وأجلــــب من أصايلها

ولا تعشـــق المدح التطبيل والهالـــه

مـا ينفـع الحـــرّ غير أفعــال يفعلها

خلّك لـ رَبْعك رفيــــق وعـزّ من جاله

ولآ تعــــــذَّر بدون أسباب .. تجملها

والشرّ فتنــــــــــــــه فلا تبدأ وتسعى له

وإن جتك زلّه فخلّ الصفــــــح يشملها

وإن جاك شاتــــــم فخلّ وجنّب خباله

خلّه يولّي ترفّــــــــــــــــــــــــــــع لا تنزّلها

الطيب عليــــــا وطيّب حظ من طاله

لا شك ما هو بدون أثمــــــان يبذلها

العمر ساعـــــــة وكل الخلق رحّاله

واللي خلقها تعهّــــــــد ما يذَمْلّها

وآخر نصيحه نطقها بآخـــــر أقواله

كمّل بها عِقْـــد .. من ( لولو ) وجمّلها

إن كان تبغا شموخك يصلب أطوالــــه

بنت الحمايـــل حـذاري لا تـغــازلها

قد قال جدّي وجدّي تصــــــدق أمثاله

الناس تخطي وتهرب من عمايلهــــــا

يا زيـــــــن جدّي ليا من نكّس عقاله

وأطلق حجاجه وجاب الـــــدرّ وأرسلها

إلى هنا تنتهي قصيدة الشاعر ( زائر المساء )

لكم خالص الشكر والتقدير مع الأحترام الوفير

مني أختكم في الله جميعا حروف من نور ..