واحالي اللي ماغير يزيدني حسره=واحالي اللي اندفن مابيني وبيني
افتح له أبوابه العوجا وأنا مكره=لو كان أحس الطّعون القاسيه فيني
مليت من حالتي وامّل على بكره=ومليت من وظعي اللي صار يرثيني
صحيح عاطل لكن الحلم وش كبره=يكبر وكنّه يسابقني على سنيني
وآحلمي اللي مخليني على جمره=جمرة غظى كنّها مابين يديني
أحلم وأصارع سهوم الغدر من غدره=أثر الزمن غادر(ن) فيني يعاديني
ياسعود وش حيلتي بحظوظ منثبره=وياخوك انا الجرح ثاويني وباليني
وشلون ابـا أصبر وانا صبري نفذ صبره=على سنين(ن) .. تعاندني وتشقيني
كسر المجاديف ياخي مالها جبره=وانا كسرني مناظر عاشته عيني
غمّضت أعيش الشباب اللي طنخ عمره=وفتّحت أشوف البطاله هم ماليني
انا اللذي من حياته جاني(ن) فقره=وانا اللي حرمان وقتي غير يجنيني
أشفق على حالتي وتخنقني العبره=وادعي عسى الرب يعوضني ويشفيني
يارب ماغيرك ارجي وراظي(ن) بامره=من عز خيرك ومن فظلك وتغنيني
عن حالة(ن) عشتها عاطل ومستتره=بالجرح والهم والتحطيم بسنيني
يارب طالبك رحمه لحالي ونصره=من ضيم مركوز في جوفي وذاويني
عبدك إلهي يغوص بموية(ن) عكره=ماغيرك أنته تساعدني وتنجيني
خطيت في دفتري واصل القلم حبره=مشاعر(ن) نزفها بشعر(ن) يواسيني

فارس الجهيمان ..

كان الله في عون الجميع ,
صح الله لسانك ,
لسان حال أو لسان مجتمع .
كل التقدير ل سموك .