|
الفزعــــــــــــه
.. السلام عليكم ورحمة الله وبركاته .. إليكم القصيده بعنوان (( الفزعه )) . . . قضى عمري وجا يوم الوعد يوم الوعد مشهود وجا يومٍ عبوسٍ مادريت منين ينهالي وصاحت جدتي وامي بصوتٍ شاحبٍ مكبود وقال الوالد الرحمه عليه وربك الوالي بكاني ربعي وخلي ثلاث ايام بالمحدود بعدها لا بكاني اخ وإلا عم او خالي رحلت لعالم البرزخ وجا والد وجا مولود وانا في حفرتي والدمع فوق الخد همالي ولكن يرحم الله يوم حبلي في الحزن مشدود بغيت اطري عليكم شي يوم اني بترحالي تراكم يوم سقتوني لقبري عادني موجود صدى تهليلكم في اذني وخوفي كيف منزالي اصيح ولاحدٍ يسمع كأني صوبكم مصدود امزق داخلي والخوف قطّع مهجة احوالي ولا كفّى حملتوني مكانٍ كل ابوه لحود وضعتوني طريحٍ والقبر محفور بقبالي وقال اللي حفر قبري . جهز قبره وانا المقصود رفعتوني وانا ابكي دم كيف اليوم مدخالي ويوم انكم وضعتوني على متن القبر ممدود طلبت وقلت ابى الفزعه دخيل الواحد الوالي فزعتوا لي وفزعتكم قبايل واجده وحشود حثاني كل واحد بالرمل ثم راح عن حالي شكيت ولاحدٍ عبّر نشدت ولاحدٍ منشود رحلت وما بقى لي شي غير الله واعمالي تحت رمل الثرى ميّت نهش لحمي غفير الدود دخلت بحفرتي ماحدٍ نشدني ويش في بالي ولكن ما علي شرهه ولا فيكم حدٍ منقود لأني ما حسبت حساب من يدرون بأفعالي انا كني ورق والذنب كنه ياجماعه نود اصدق كذبة الازمان لجل الجو يحلا لي وذي الحزه انا مدفون وايامي سموم وسود بعد ما كانت الايام في فسحه تورى لي وياللي تنظر المكتوب لا تبكي على المفقود لأن بيوم ياتي لك مثل ماليوم قد جالي ولكن ارفع ايدك في صلاتك لله المعبود واقر ما هو تيسر لك لعل دعاك يسلا لي ويامن تبكي الميّت ترى ماني عليكم زود بعد بكره يجيك اللي وفاني يوم ترحالي وسلامتكم واعذرونا على القصور |
رد: الفزعــــــــــــه
الله الله
الله يرحمنا احياء وثم اموات اخوي امير صح الله لسانك وعلى شانك على البحر اللي اشوفه قدامي والموت كلنا بنجيه بس وين اللي بيتحمل وبيبشر بالجنه نسئل الله العفو والمغفره لاهنت طال عمرك على الجزاله لك كل الود والاحترام |
رد: الفزعــــــــــــه
امير الشريف صح لسانك حتى ترضى
والله لا يهينك وجزاك الله خير على هذه الموعضه واتمنى ان تصل الى القلوب كما خرجت من القلب تقبل تحياتي وخالص تقديري |
رد: الفزعــــــــــــه
الله الله على هالابيات يا الامير
بصراحه عشت حاله خاصه مع هالقصيده الله يجزاك خير ويحسن خاتمتك ويعيننا ويعينك على حياة البرزخ صح لسانك ولاهنت تحياتي |
رد: الفزعــــــــــــه
أبيات رغم آلحزن..إلا انها بمثابة نصيحه..
صح لسآنك يـ الأمير..ولاهنت آلله يصبرك..وجزآك الله ألف خير |
رد: الفزعــــــــــــه
أمير الشريف صح الله لسانك على الأبيات المصورة للحدث الحقيقي الكائن لامحالة يوما من الايام شاعر تستحق الاشادة وصح لسانك لو ماتكفي الكلمة.......تحياتي
|
رد: الفزعــــــــــــه
لاهنت اخوي امير على القصيده الجزله وعسى ويستفيد الناس من الموعظه وتقبل مروري
|
رد: الفزعــــــــــــه
اقتباس:
|
رد: الفزعــــــــــــه
اقتباس:
|
رد: الفزعــــــــــــه
اقتباس:
الله يبيض وجهك على المرور الاكثر من روعه .. وصح بدنك ولاهنت يالغالي .. |
| الساعة الآن 10:31 PM |
Powered by vBulletin® Copyright ©2000 - 2025, Jelsoft Enterprises Ltd.
HêĽм √ 3.1 BY: ! ωαнαм ! © 2010
