ياسعود وين فهيد له عام ماشيف=اقفت بـه الدنيـا وقفـى بختهـا
مدري غيابه له ضروف وصواديف=والا ليـال العمـر قـل بركتهـا
والا سمع له في قفايـه سواليـف=من هرج نـاس ٍ ماتثمـن لغتهـا
الي على نقل النميمـه خواطيـف=والمرجلـه وعلومهـا مابغتـهـا
الحمـد لله ماعلـيـه تخالـيـف=عنيـت نفسـي للعـلا واعتلتهـا
وابوي حلفني وثنًـى التحاليـف=وعهود من صغري ونفسي وفتها
الاولـه فالديـن قبـل التكاليـف=أوفي صلاتي لين روحي هوتهـا
والثانيه حسن التواضع ولاضيـف=الكبر لو نفسـي زمانـي شمتهـا
والثالثه وافي مع الجار والضيـف=من جود يمنايه وبلـي كسبتهـا
والرابعه حلو النبى والتصاريـف=اخذ من الجـزلات حلـو ثمرتهـا
والخامسه متبع هل الهرج والزيف=اتبع دروب ٍ بالشهامـه صفتهـا
هاذي مناهيجي وخذ زود تعريـف=ناس ٍ تقفـي شيمتـي ماقفتهـا
وأشره على الطيب لجاله محاريف=ورجلي دروب اهل الردى ماوطتها
تناقضت ياسعود بيض المضاريف=واثر الليال السود معهـا محتهـا
العام عندي كنها حنيـة السيـف=واليوم اشـوف ايامهـا حانيتهـا
مغير الطف خاطر القلب تلطيـف=ومن حضها بالدمع عيني بكتهـا
لاكن صابر لو مالـي تصاريـف=وسود الليالـي نحتمـل عاقبتهـا
مركب خيالي شلت عنه المجاديف=وروابعي سبع البحـور سبحتهـا
واشيل هم الي لهم بالوفاء كيـف=ونفسي مشاريه الزمـن عانقتهـا
وياسعود وين فهيد له عام ماشيف=هو حي فـوق الارض والا تحتهـا ..؟