الملتقى الجماهيري للشاعر محمد بن فطيس المري

الملتقى الجماهيري للشاعر محمد بن فطيس المري (http://www.m-f6es.com/vb/index.php)
-   الشعر و الشعراء (http://www.m-f6es.com/vb/forumdisplay.php?f=15)
-   -   لويربط جنونه لشاعر والشيخ عبدالله بن جملا (http://www.m-f6es.com/vb/showthread.php?t=24357)

عبدالله السفياني 03-05-2019 07:51 AM

لويربط جنونه لشاعر والشيخ عبدالله بن جملا
 
على شريط الذكريات المصونه
ناسٍ يمروني ولا يستمرون
الهذر في وجه الحيا يمسحونه
والعذر بكره بعد بكره يطيبون
ويجملون العذر ويجاملونه
ولا لهم في سيرة العون ماعون
ويقصرون العلم ويطولونه
من راس حيد اليا بعوضه فما دون
ماقلت شيٍ غير يستاهلونه
رغم انهم رديان ؛مايستشكون
وانا بعد عندي شوية مرونه
تسمح لهم في كل وادي يهيمون
عامين ياربي عليك المعونه
ظليت اطالبهم بما يستطيعون
وامد معروفي وهم ينكرونه
وادلهم لكنهم مايطيعون
واجي لهم بالطيب ولا بدونه
واتعب واعلمهم ولا يستفيدون
لاشافوا الجمهور تضحك سنونه
يرمونها عوجا ولا يستشيرون
واطيبهم اللي ماسرت به ظنونه
هم يمدحونه صدق ولا يذمون
ياناس ردوا لي بليا مهونه
واستنتجوا برهاني ان كان توحون
تدرون وش ثور علي السخونه
ياليتكم ياليتكم كان تدرون
ان القصيد اللي بدوا يزفرونه
تستنشقونه ثاني اكسيد كربون
والشاعر اللي قام يسحب ردونه
ويحمل الحضار مالا يطيقون
ماهي بشينه لو يربط جنونه
ويفكها بين القرابه والأهلون
اثنين يثنونه وهم يحرجونه
ويقول انا شايف مثل ماتشوفون
واثنين من حوله ويستدرجونه
على شريعة مالها أي قانون
والموقف المحرج والاكثر رعونه
مبداه في حضرة مقام ابن خلدون
يقرب من المايك وتصغر عيونه
واحلى سلام ويبتدي فلم كرتون
الليل واول شطر يعكز بشونه
واول مايطري في خيالي شطرطون
يرسل ويسترسل ولا يفهمونه
الا ان ماقاله مقفى وموزون
مايدري ان الشعر تسبح غصونه
على حمامة في طرف غصن زيتون
اليا دخل في جو حرك سكونه
بمفكرةصاحي وتفكير مجنون
مافيه احد هازه ولا طاح دونه
على خبر مكشوف عن سر مدفون
والهزل من بياعته لا زبونه
يالله عليهم منك مايستحقون
مايحمدون الله ولا يشكرونه
على الستر والعافيه لو يعافون
هزل القصيد اللي تكاشف مزونه
على كلامٍ كان ماوده يكون
هذي نصيحة من تحمل ديونه
ون كان ماطاعوني اليوم طاعون

الشيخ / عبدالله بن جملا


الساعة الآن 04:40 PM

Powered by vBulletin® Copyright ©2000 - 2024, Jelsoft Enterprises Ltd.
HêĽм √ 3.1 BY: ! ωαнαм ! © 2010

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69