الملتقى الجماهيري للشاعر محمد بن فطيس المري

الملتقى الجماهيري للشاعر محمد بن فطيس المري (http://www.m-f6es.com/vb/index.php)
-   ساحة القصائد والقصة والخواطر المنقولة (http://www.m-f6es.com/vb/forumdisplay.php?f=17)
-   -   العلوم الغانمه (http://www.m-f6es.com/vb/showthread.php?t=24255)

سااهر 10-28-2017 02:35 AM

العلوم الغانمه
 
.
.

المجلس اللي مدهلاً للرياجيل
وكل العلوم الغانمه في ركونه

تفخر به زحول الرجال المشاكيل
واكبر فخر يومنهم يدهلونه

يجذبك ريح العود والبن والهيل
اللي لشيخان العرب يجلبونه

عقبه فقار الحشو ومفطح الحيل
من السخا كوم الشحم في صحونه

راعيه مايسمع هل القال والقيل
واهل الحسد والغش مايدخلونه

زحلٍ من ازحول الرجال الحلاحيل
يضحك حجاجه قبل ضحكة سنونه

واللي يجي في مجلسه خيرة الجيل
كلٍ من الحكمه كلامه يصونه

عقيّل لا قالوا هل العرف عقيّل
وحتى معزبهم قليل النمونه

بالطيب اعده ثالث الجدي وسهيل
راسٍ على الطاله تعزّه متونه

طيبه مهيل وماقفه دايم مهيل
من حبه الله حط هالرجل عونه

ليا غضب يقلب نهار الغضب ليل
وليا رضي ياخذ من الشاش لونه

سحاب جوده بالمكارم محاميل
غيثٍ من الخالق تنثّر امزونه

تعجز عن اوصافه جميع التفاصيل
ومشاعر الشاعر بوصفه تخونه

مهما مدحت تحس فالمدح تقليل
مدري جنون الطيب والا جنونه

فصيلته لو تنعرض للتحاليل
فيها جميع المكرمات مخزونه

كنها تقول السيف والليل والخيل
هالادمي قبل البشر يعرفونه

في ماقفه صارم وحازم وحلحيل
للشر شر وللشكاله معونه

من نور وجهه تستنير القناديل
وتخشا ملوك الجن نظرة عيونه

واللي عطاه الله مواهب وتفضيل
لا تنشدونه كيف لاتنشدونه

يشيل في صدره من الهم ماشيل
من وسع صدره تختفي في سجونه

للعز شامخ والمقافي مقابيل
راسٍ تطيح مطنّخ الروس دونه

عز الله انه من بعاد المداهيل
طرادته ماشرهوا يلحقونه

في خطوته للمجد يقطع مية ميل
وشلون مايبطون ماياصلونه

كل الصعايب في طريقه تساهيل
يشتالها مع مشلحه في اردونه
.
.
-

#شعر
سلمان عزيز الحافي


.


الساعة الآن 12:03 AM

Powered by vBulletin® Copyright ©2000 - 2024, Jelsoft Enterprises Ltd.
HêĽм √ 3.1 BY: ! ωαнαм ! © 2010

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69