راكب اللي حول من السفينـه فالرصيـف=وإنطلق من بحر جده علـى خـط الشفـا
مر بالطايـف وردت جماهيـر المصيـف=مرحبـا باللـي لفـا مرحبـا باللـي لفـا
وش تقول من التواصيف وإلا وش تضيف=إرسم الغيمه على أربـع عجـلات وكفـا
الهنوف اللي تردك مـن الدنيـا إمعيـف=ضايفن منها علـى سكبتـه وجـه وقفـا
لاوقف يعدل مزاجه مـن الخـام الخفيـف=مادرى راعيـه هـو يشتغـل وإلا طفـا
وإن تهبـد فالمطبـه تهـبـاد الكفـيـف=مشي وضحن فآخر الذود تضلع من حفـا
ماعليه إلا أمنية شاعـرن قلبـه نظيـف=لاحقه من جـور الأيـام هجـران وجفـا
وده إن الغيم مـدرار والـوادي إمريـف=ونصف شعب المملكه من خوال المصطفـا
في نفود السر من شرق داورد وعفيـف=خمسة حروفن مع خمسة حـروف إحلفـا
إرفعوها فالمنصه علـى بـاب المضيـف=وإحفظوها وإنحتوها على الصـم الصفـا
تثبت أوتادك على البيد يالضلـع المنيـف=مابنتك عـزوم قومـن كسـالا وإضعفـا
دونك الهيـلا بالأفعـال والحـد الرهيـف=إن صفـى عجـاج الأيـام وإلا ماصفـا
شجرتن ماطير أوراقهـا فصـل الخريـف=في طرفها للخـوي قـوت وظـلال ودفـا
مايبت إحبـال الأجـواد رجالـن شريـف=وخاين الذمه من أنكر عـن الحـق ونفـا
الظفر معهم خوي والكـرم معهـم وليـف=طيبهم طيب ووفاهـم ماهـوب أيـة وفـا
ذا وأنا مانيـب الأول مكـرر والوصيـف=من سبيع اللي على صهوة المجـد إردفـا
عزوتن من صيهد رماح لا واد الغريـف=بشتهـم لاشمـرت دقلـة الحاكـم ظفـا
فزعة إبن سعود في نصرة الدين الحنيـف=والله مافيهـا كنـيـا ولا فيـهـا خـفـا
والحياه أكبر مغره وطيب العيـش زيـف=من عطى لله وجهـه عطـى الدنيـا قفـا