حسبي على الايام وظروف الايام=وشلون عن وصلك وقربك حدتني
صوبك مواريد الغلا كلها احيام=وباليأس والفرقى روت ثم سقتني
سقوا ليا طيفك تعًرض لي وحام=وأستعصف بذكرى ٍ قديمه كوتني
ينزاح عن بالي هواجيس وأوهام=وأعيش بأوهام السعد لالفتني
وافز من نومي على حامي وسام=وأوهام شوقي بالعذاب اشحنتني
صارت عروش الوصل من بعدك أحطام=والشوق ناره فالضمير أحرقتني

العمر محسوب والايام محسوبه=وانا حسابي وصل غاية مناهيها
الصبر من دون غايه نار مشبوبه=ياطول صبري وناره كيف اطفيها

الحب مات ولابقى غير ذكراه=أنتي بصدك والتغلي قتلتيه
ورد الغلا من فيض الاشواق مجناه=وأكبر خساره بالخيانه قطفتيه

سواد الليل يجذبني=ليا ذعذع بنسناسه
يشوق القلب والخاطر=وبالي يبعد عماسه
ليالي نجد مخصوصه=جميله كلها إوناسه
على لمة رفاق الطيب=رجال ٍ للوفاء ساسه
وأخص الوافي الغالي=فخر راسي ونوماسه
أخويه محزمي كنزي=جمال العز ونبراسه
عساه بخير في وقته=ويسلم من عناء باسه
ليا مني تذكرته=يزيل الحزن وأقواسه
غيابي هم بال وقلب=وعيني للقاء ماسه
وفيه الشعر يعجبني=ليا من طاب هوجاسه
اصفي له جزيل القول=بيوت ٍ تخضع أشراسه
نوادر من ذهب غالي=ومعنى غيره إنحاسه
حفظت من القصيد أجمل=جماله مع تغطراسه
شوارد مابها ناقص=من الخاطر وحساسه
عساها تاصله في حين=وتبعد عن غثا ناسه
أبشرح له معانيها=رموز ٍ حيل غطاسه
ليالي مع بياض ايام=وشاح الوقت مع طاسه
فخر يطلب فخر ثاني=وثالث مالقى كاسه
عساها من سعادة خير=تبين وتاخذ أفراسه
وباقيها سلاماتي=وقافي طاب هوجاسه

ياجرح قلبي منك ياسيد الاحباب=وليتك تحس بلوعتي وأشتياقي
من غيبك غاب الفرح والسعد غاب=وقلبي على فرقاك ماهوب هاقي
ياليت لهل الحب قاضي وكساب=حتى يحكم بوصل عقب الفراقي

العين من نوم ليلي يافهد ملت=والسهر عيا من اللوعه يفارقها
لاواه ياطلة المجمول لاطلت=ترهي من الشوق كله لجل عاشقها
من بيننا عهد ماننساه ولو قلت=أفراحنا في زمان ٍ طال عايقها
منساه مادام روحي في من تلت=ولاهيب تنسى لو ان الوقت حارقها

الله الي يعلم الظاهر ويعلم بالسراير=في حضورك نار ياغالي وفي هجرك عذاب
قبلة الله كانها دارت على وصلك دواير=سعد عيني يابعد عيني عقب نار الغياب
أفهمي وش قلت لك حب الوفاء ماهوب باير=يعتلي بين النجوم العاليه فوق السحاب

من عقب جينا من الدوحه=سلام ياطرقة المسرا
لقيت بيبان مفتوحه=ماهيب زينه ولاقشرا

من عقب قلبك فقد نوحه=يامرحبا بليلة القمرا
مني وانا راعي الصوحه=لابد ماناخذ البشرا

ياطول صبرك على بوحه=بالله من وين هالصبرا
كلن مشى حسب مصلوحه=وأنته تثنيت فالغبرا

أوضاع وأوضاع مشروحه=لكن بالعين ماتقرا
بالهون نورك بدا ضوحه=واشيل بلوه فالهدرا

لابدن ولاهيب مسموحه=إجنازة ٍ خارج القبرا
صمت الشقاوي على روحه=في زود جرحه ولايبرا

الحر لاقاموا اطروحه=عليك من صوبهم جبرا
صمت البنادم وطاروحه=ياليت تنفعهم العبرا

ياقلب درب الحب لو طال ممشاه=عواقبه ياقلب ماهي حميده
كم عاشق ٍ قبلك من الحب شكواه=امسى من الحرمان فاقد فقيده
وش عاد شوق ٍ حرق الدم قسواه=مره ومره مع مرار ٍ عديده
يشفق على حي ٍ من الشوق ناداه=وارهى وداده للظروف الشديده
تكوى فوادي زود لاجات ذكراه=تخلج حنايا الصدر نار ٍ وقيده
... لامرت الذكرى على غير مشهاه=ولع على معاليقه بعالي ضديده
ياتل قلبي تلتين ٍ من أقصاه=والثالثه منها تمزع وريده
على الذي صوب فوادي وخلاه=بين الجروح المعضلات الجويده
ماطاعني يوم اني ادراه وانهاه=عنيد والحق هم نفسن ٍ عنيده
يحرق معاليق الحشاء يوم اني انخاه=اقفت دروب الوقت بلي تريده
له نوحة بأقصى الضماير تصلواه=توقد على جمر الغرام وتزيده
ياعاذلين القلب من دون مشاه=لاتعذلونه دون منهو يريده
عايش على كيفه واداريه برضاه=وارجي عسى باقي حياتي سعيده
وان عاد طيف الحب ماقلت حياه=شر ٍ على جرح ٍ عذابي صديده

سلام ردية وفاء وأهل الوفاء من طيبها=ياصاحبي عامر ولد صالح ليا قلت السلام
الدار دار العيربي والموت عاوي ذيبها=والله على كل الخلايق يارفيقي بالتمام

يا مرحبا والطيب حاصل والعرب تدريبها=يا ابن العتيبي يا وريث المجد يا راس وسنام
الدار دار ابن السعود واللي بغى تخريبها=يلقا معادينه على مد البصر مثل الحسام

دام البقى والملعبه واضح لكم ترتيبها=لو البقى تال الزمن ياصاحبي ماقلت دام
راعي تهامه لايفارق ياولد لاشعيبها=ماله ومال الطرقه الي تحرق اصدور النعام

الله على الأول وتال القوم من غاديبها=والوقت يفرض ملته والناس بيدها الخطام
هذا البلس راسه يعدي خيمتك وطنيبها=والصقر ما ياكر سوا متعلين فوق الغمام

وش فيك تخطي كلمتي ياصاحبي وتصيبها=دونك حلال السوق جنب لاتجي سوق الحرام
دنياك ماندري وش الي تحضنه في غيبها=مير الله الي يعلم الخافي ولله المقام

منك الخطا بادي ولكن جنب الله عيبها=والغاليه كسابتي لو كان تاتي بالخصام
ما تحت ربي عالم ن والنفس من تهذيبها=والصاحي اللي يدرك الزله ويلجمها اللجام

على الهون تكفى ياطبيب القلوب إصبر=خل الجماعه يبعدون وتقدم لي
معاك الاشاعه صورت القلب لاتظهر=أخاف ان فيها من بحبه ترنم لي
غرام الفواد الي عليه الزمن يقصر=ظروفه وانا شوقه بنومي تنهم لي

يانسيم الليل وأن حركٌت في قلبي شعوره=مايثير أحساسي الي مات من بين الضلوع
والسبب علم ٍ عليه نار في ساعة نشوره=شب في قلب ٍ على عهد الهوى دايم خضوع
قلب عاشق تحمله نفس ٍ على اللوعه صبوره=مير في تالي زمانه صار من حاله جزوع
عقب مات الي يحبه كل كونه ضاع نوره=صار ينعى للنصايب ويتهشم بالدموع

اسمع صدى صوتي المبحوح واسمعني=كثر النياحه تراها من ورى نحبي
ما فالهوى غير جمر ٍ فيك ولعني=لو كان كل المشاعر بابها رحبي
الله عطاك الغلا والشوق يدفعني=يشرح لك الخاطر ومعناك يشرحبي

العشق والشوق نار ولابقى منـه باقـي=في قمة العشق شبت يالعشاشيـق نـارا
ابديت عن مايكنه خاطـري لأ أشتياقـي=وشفت الامل عقب حل العشق عني توارا
لاواه ياطول صبر الي من الوقت ذاقـي=سم الفراق وطواه اليأس طًوي الفقـارى

اخذ السرور الي يحيط بحياتـي=وهات الفراق الي كواني بنـاره
واترك فواد ٍ خلف الاسراب باتي=عايش على ذكرى زمانه وساره

وش حيلة الي فالهوى ماله اسنـاع=يلي فوادي مـن سبايبـك ينخـاك
ان جيت اعذل القلب عيا ولاطـاع=وان جيت ابنسى فز قلبي ونـاداك
تكفى تعالج قلبي الـي لـه انـزاع=جرح ٍ صطى به والسبب رمح يمناك
اليـا تعلـى للمعاليـق وانـصـاع=ناداك مـن نزفـه وخـاوا وحيـاك
اخفيك ياجرح الهوى بين الاضـلاع=والناس في حالي من الهـم تقـراك

الصمت عن مودع حياتك مصيبه=لاترتجي من زلة الصمت كلمه
الناس بين المخطيه والمصيبه=وانته تعيش الصمت طبعه وسلمه