للشام آسـف ، دامنا ما انتفضنا
ونوماً دنيئاً ، عن خيانة فلسطين

دايـم نـفكّـر [ كيف ناكـل بعضنا ] !
وعشنا وشفنا وشبعت روسنا طين

كنت اتفلسف عالمحبة والاحباب
مثل مدرس ما يعرف الدراسة

واليوم قلبي عقب ما قفل الباب
جاله غرام يزلزله من اساسه

الناس في هذا العصر ماهي بخير ..
وعلى اختيار اللفظ ماهي حريصه
قال (انتي غير) وقالت (انته بعد غير) ..
الين صارت هالعبارة رخيصه..!

قراري متوازن وعقلي حازم
لكن أحاسيسي لها منحازه


أنا قدرت أهزم جيوش العالم ..
بس هزمتني هذي الغمازه

ايه بدوي .. لكن في لحظة شرودي
أخلق من أحلامي شعوب و حضارات

ما أفتخر بأصلي ولا طيب عودي
أفخر إذا لبيت للناس حاجات

أحب كل الناس .. احب اليهودي
إنسان كوني.. ما تهمني الشعارات

ماهو تشاؤم .. علمتني التجارب
إن الفرح أول فصول المعاناه

وإن القصيدة .. استراحة محارب
وان الحياة الحرب .. والطيب مأساه

ما أملك قصور وأراضي وثروة
ما أملك إلا نعمة ( الحرية )

يعني أنا من دون أي منازع
أغنى رجل على الكرة الأرضية

يا صاحبي دام وقتك نصفه عبادة
لا تنظر لجد غيرك نظرة الساخر

إذا يحق لأحد يفخر بأجداده
اسمح للامريكي بأجداده يفاخر

في ظرف قرنين سادوا سادة السادة
لين ورثوا الارض وانت بنومك تشاخر !

لكن الانسان يفخر بعد ميلاده
بأخلاقه وروحه وتفكيره الزاخر

لا تعيب منهو كسب في مهنته زاده
لو كان عامل في قارب في البحر ماخر

مصير كل الخدم والساده القاده
كفن رخيص وقبر وعظام متناخر

في هالمدينة محّد يساعد أحّد
إلا بمقابل .. والبشر في خصومه

يعني اعذروا الإنسان لامن توحّد !
الله يلوم اللي يفكر يلومه ..

كل نقطه بالدفتر وراها شجرة تين
وكل فاصلة في بطنها برتقاله

من تحت جلدي لما افكر تبينين
وحتى انفعالي يعترف بانفعاله

تحررت كل الوجيه المعابيس
وظليت وحدي مغترب بين ناسي

أنا أعز من الملوك الطواويس
ولو جوازي ماهو بدبلماسي

بس اختفى عرشي مثل عرش بلقيس
فرقاك جمرة ذوبت ثلج باسي

ايه انا عزوبي وأيامي كسيفه
حارمتني من مداعبة البكر

وين الاقي بنت مملوحه ظريفه
تجتمع فيها الأنوثة والفكر

من عجبني شكلها تطلع سخيفه !
ومن عجبني عقلها تطلع جكر !

ترضين راسك يمتلي بالتفاهات ؟
وتقضين وقتك للمظاهر رهينه ؟

حلوه ولكن في عداد السخيفات
رزين جسمك .. بس منتي رزينه !

الحب دكتاتور .. يحكمنا ولو ما يُنتخب
نفتح له الشباك ونستقبل غباره والضباب

يا صاحبي .. الحب هذا مثل حكام العرب
لاهو يتأسف لا غلط ولاهو يخضع للحساب

اخاف من كثر الذهول احسدها
لا شفتها اصير سطحي وجامح

يمر نص الموعد امدح جسدها
ونصه بتوصيف الشعر والملامح

ترى المسج منك ولو انه وجيز
ياخذ عظمته من فخامة صاحبه

يالشاعر اللي لو قروه الانجليز
كان الوجيه البيض صارت شاحبه

كل شي يبدا صغير وبعدها يكبر
والحب يبدا بقوّه ثم يتلاشى

الفكرة هذي رسمها الواقع الأغبر
كيف أتأقلم مع الواقع وأتماشى ؟

تدري متى السلام بيكون سايد ؟
لا صار حزب الحب .. يحكم بلادي

وتدري وش احلا من جميع القصايد ؟
صوت الكعب لما تمخطر هنادي [فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]